Европа Иттифоқи мамлакатлари яқин келажакда коронавирусга қарши эмланганлик тўғрисида рақамли сертификатлар яратишга келишди. Бу ҳақда Германия канцлери Ангела Меркель Евроиттифоқ давлатлари раҳбарлари билан ўтказилган учрашувдан кейин баёнот берди, деб ёзмоқда Meduza.
Меркелнинг таъкидлашича, ҳамжамият мамлакатлари яқин уч ой ичида тегишли сертификатларни жорий этиш ва уларни ягона тизимга бирлаштиришни режалаштирмоқда.
Меркель бундай сертификатлар билан Евроиттифоқ ҳудудида эркин ҳаракатланиш мумкинлигини таъкидлади. Шунингдек, сертификатнинг мавжудлиги Евроиттифоқга учинчи мамлакатлар резидентларининг кириши учун асос бўлиб хизмат қилади.
Шу билан бирга, Европа Кенгаши раҳбари Шарл Мишел мазкур ҳужжатдан фойдаланиш мезонлари ва уларнинг эгаларига бериладиган имтиёзларга ҳали аниқлик киритилмаганини таъкидлади.
Маълумот учун 2020 йилнинг март ойидан бери Европа Иттифоқига бошқа мамлакатлардан ташриф буюрувчилар учун ташқи чегаралар ёпиқ. 2020 йил июль ойида ўнга яқин мамлакат аҳолисига Евроиттифоқга эркин кириш ҳуқуқи берилди, ўша пайтда бу мамлакатларда касалликнинг тарқалиши минимал даражада бўлган, шу жумладан, кейинчалик рухсат берилган мамлакатлар рўйхати бир неча марта қисқартирилди. Ҳозирда бундай давлатлар атиги олтита — Австралия, Янги Зеландия, Руанда, Сингапур, Таиланд ва Жанубий Корея.
Айни пайтда Евроиттифоқ ичида ҳам саёҳат қилиш чекланган. Иттифоқ мамлакатларидан бирортасида яшовчи фуқаро ҳамжамиятнинг бошқа аксарият давлатларига фақат жиддий сабабларга билан, масалан, иш ёки оиласи бағрига қайтишни мақсад қилган тақдирда кириши мумкин. Иттифоқнинг баъзи давлатларида COVID-19 тестининг салбий натижасини кўрсатиш билан эркин ҳаракатланиш мумкин бўлади.
Эслатиб ўтамиз, Европа Иттифоқи кенгаши пандемия юзасидан Шенген ҳудудига кириш чекловлари бўйича янги тавсияларни маъқуллади. Янги чекловлар 2 февраль куни ёзма тартибда қабул қилинди. Хусусан, тавсиялар ЕИнинг учинчи мамлакатлар билан чегараларини ҳар қандай ташриф, шу жумладан, сайёҳлик учун очишига оид янги шартларни назарда тутади. Бунинг учун мамлакат бир қанча мезонларга жавоб бериши керак.
Изоҳ (0)