Европа Иттифоқи Венесуэланинг ҳудуддаги доимий вакилини persona non grata деб эълон қилди. Бунга сабаб қилиб республиканинг ҳамжамият вакилига нисбатан худди шундай муносабатда бўлгани кўрсатилмоқда, деб ёзади «РБК».
«Европа Кенгаши бугун Венесуэла Республикасининг Европа Иттифоқидаги элчихонаси раҳбарини persona non grata деб эълон қилишга қарор қилди. Бу Венесуэла ҳукуматининг Венесуэладаги Евроиттифоқ делегацияси раҳбарини persona non grata деб эълон қилиш тўғрисидаги қарорига жавобдир», — дейилади баёнотда.
Эслатиб ўтамиз, 22 февраль куни Европа Иттифоқи Венесуэла расмийларига қарши янги санкциялар эълон қилди. Чекловлар 19 нафар мансабдор, жумладан, Миллий сайлов кенгаши президенти Индира Альфонсо, кенгаш вице-президенти Леонардо Моралес, Қуролли кучлар стратегик операциялар қўмондонлиги раҳбари, адмирал Ремихио Себалос Ичасо, шунингдек, Миллий ассамблея аъзолари ва судьяларга нисбатан жорий этилди.
Бунга жавобан Венесуэла ҳукумати 24 февраль куни Евроиттифоқ элчиси Исабел Брилянте Педросони persona non grata деб эълон қилди ва унга мамлакатдан чиқиб кетиш учун 72 соат муҳлат берди.
Евроиттифоқнинг фикрича, Венесуэланинг бундай хатти-ҳаракатлари фақат мамлакатни янада яккаланишига олиб келади.
Изоҳ (0)