Арманистон мухолифати ўз ваъдасини бажарди, митинг иштирокчиларининг бир қисми Ереван кўчаларини тарк этмади ва туни билан парламент биноси ёнида қолди, деб хабар беради «РБК».
«РИА Новости» ҳисоб-китобларига кўра, парламент ёнида 200 га яқин одам қолган. Бошқа манбаларга қараганда, уларнинг сони бир неча юз кишини ташкил қилмоқда. Намойишчилар Баграмян шоҳкўчасини эгаллаб олиб, бир нечта чодирлар ўрнатган ва гулхан ёққан. Улар шу ерда посбонлик қилаётган полициячилар билан зиддиятга бормаган.
Арманистоннинг мухолиф етакчилари бир кун аввал кечқурун парламент яқинидаги шоҳкўчани тўсиб қўйган ҳолда, бош вазир Никол Пашиняннинг истеъфосини талаб қилиб муддатсиз акция бошлашга чақирган эди.
Арманистон Қуролли Кучлари раҳбарияти 25 февраль куни Пашинянни истеъфога чиқишга даъват этувчи баёнот билан чиқди. «Арманистон бош вазири ва ҳукумат инқирозли ва ҳал қилувчи вазиятларда муносиб қарорлар қабул қилиш имкониятига эга эмас», — дея маълум қилди ҳарбийлар.
Бу баёнотдан аввал Пашинян ва Бош штаб бошлиғи ўринбосари Тиран Хачатрян ўртасида зиддият бўлиб ўтган эди. Бош штаб вакили Қорабоғдаги можаро вақтида Россиянинг «Искандер» мажмуалари ракеталарининг 10 фоизга яқинигина ишга тушганини айтган бош вазирнинг гапларини танқид остига олган эди.
Пашинян Бош штабнинг ўз истеъфоси ҳақидаги талабини ҳарбий тўнтаришга уриниш деб атади. У ўз тарафдорларини Еревандаги Республика майдонига, парламент биносига чақирди ва Бош штаб раҳбари Оник Гаспаряннинг истеъфоси ҳақида эълон қилди.
Мавзуга доир:
- Арманистон Бош штаби Пашиняннинг истеъфосини талаб қилди. Унинг ўзи буни ҳарбий тўнтаришга уриниш деб атади ва тарафдорларини намойишга чиқишга чақирди
- Арманистонда сиёсий вазият кескинлашди. Ҳарбийлар Никол Пашиняннинг истеъфосини талаб қилмоқда. Ереван марказида норозилик намойишлари бошланди. Асосий воқеалар
Изоҳ (0)