Тошкентнинг Олмазор тумани Уста Ширин кўчасида жойлашган қандолат ишлаб чиқариш цехида иш берувчининг айби билан вояга етмаган боланинг қўли дастгоҳга кириб кетди. Бу ҳақда ИИВ Тергов департаменти хабар берди.
Воқеа 15 январь куни соат тахминан 22:00 да юз берган. Цехда ёлланма ишчи бўлиб ишловчи вояга етмаган 16 ёшли бола Б.Д. ўзига юклатилган вазифаларни бажараётган вақтида қандолат маҳсулотларини бўлакларга бўлиш учун мўлжалланган дастгоҳга қўли кириб кетиши натижасида ўртача оғир тан жароҳати олган.
Олиб борилган терговга қадар текширув ҳаракатлари натижасида ушбу қандолат ишлаб чиқариш цехида иш берувчи 55 ёшли Х.Р. вояга етмаган Б.Д. билан меҳнатни муҳофаза қилиш бўйича йўриқнома ўтказмагани ҳамда билим савиясини текшириш ишларини ташкил этмагани, техник хавфсизлик қоидаларини тушунтирмагани аниқланган.
Ҳолат юзасидан Олмазор тумани бўйича ИИО ФМБ ҳузуридаги Тергов бўлинмаси томонидан иш берувчи Х.Р.га нисбатан Жиноят кодексининг 257-моддаси 1-қисми (меҳнатни муҳофаза қилиш қоидаларини бузиш) билан жиноят иши қўзғатилган.
Ҳозирда тергов ҳаракатлари давом этмоқда.
Изоҳ (0)