Европа Иттифоқининг учта мамлакати ҳуқуқ-тартибот идораларининг қўшма тадбири давомида гиёҳванд моддалар сотувчиларидан жами 23 тоннадан зиёд кокаин олиб қўйилди. Бу Европа қитъаси учун янги рекорд ҳисобланади, дея хабар қилган Нидерландия полицияси.
«Аввал ҳеч қачон бу қадар кўп кокаин олиб кириш ҳолати кузатилмаган эди. Ишга алоқадор бўлганларни қўлга олиш ва суриштирув ишлари Нидерландия, Германия ва Бельгия полиция, божхона ҳамда прокуратура органлари билан ҳамкорликда олиб борилди», — дейилган хабарда.
Гиёҳванд моддалар Антверпен ва Гамбургдаги портларда мусодара қилинган, бу ерларга кокаин партияси Панама (ёғоч ортилган контейнерларда) ва Парагвайдан (девор учун бўёқлар ортилган контейнерларда) кемаларда олиб келинган. Нидерландия ҳуқуқ-тартибот идоралари 7,2 тонна, Германиядаги полиция, божхона ва прокуратура 16 тонна кокаинни фош этган.
Гиёҳванд моддаларни қитъа ҳудудига олиб кирган шахс 28 ёшли Нидерландия фуқароси бўлиб чиқди ва у ҳибсга олинган.
Германия ҳуқуқни муҳофаза қилиш идораларининг вакиллари агар мазкур кокаин партияси кўчада сотилиши бошланганида «савдогарлар» сотувдан бир неча миллиард евро даромад кўриши мумкин бўлганини қайд қилди.
2020 йил ноябрь ойида Бельгия полицияси Антверпендаги портда қиймати 900 миллион еврога тенг бўлган 11,5 тонна кокаинни фош этган. Ўшанда бу бутун дунёда полиция фош этган гиёҳванд моддаларнинг энг катта ҳажмдаги миқдори эканлиги маълум қилинганди.
Изоҳ (0)