Чехияда коронавирусга чалиниш бўйича кунлик антирекорд қайд этилди

Чехияда қарийб икки ой ичида илк маротаба коронавирусга чалиниш ҳолатининг кунлик ўсиши 15 000 дан ошди, деб ёзмоқда «Korrespondent.net».

10,7 миллион аҳоли истиқомат қиладиган мазкур мамлакатда 23 февраль, ўтган бир кеча-кундузда инфекция юқтириш бўйича 15 672 та янги ҳолат тасдиқланди. Охирги марта бундай юқори кўрсаткич 6 январь куни қайд этилган. Январь ойининг ўрталаридан февраль ойининг иккинчи ярмига қадар касалланишнинг кунлик ўсиши 10 мингдан кам бўлган.

Минтақавий жиҳатдан энг оғир вазият мамлакатнинг бутун жанубий қисмида кузатилмоқда. 23 февралда аниқланган янги ҳолатларнинг аксарияти — 2500 дан ортиғи Богемиянинг марказий қисмида, деярли 2000 та ҳолат эса Прагада қайд этилди.

Шу билан бирга, айни пайтда касалликни бошдан ўтказаётган беморлар сони кузги тўлқиннинг энг юқори чўққисидаги беморлар сонига қараганда кўпроқ — 127 000 дан ортиқ, шундан 6800 га яқини касалхонага ётқизилган. Аҳволи оғир беморлар сони 1389 нафарга етган, бу бутун эпидемия давридан бери кузатилган энг юқори кўрсаткичдир.

Соғлиқни сақлаш вазирининг ўринбосари Владимир Чернининг таъкидлашича, коронавирусга чалинган беморлар учун реанимация бўлимларида атиги 15 фоиз бепул жой қолган. Мамлакатнинг Махсус инқироз маркази Германия касалхоналаридан ёрдам сўраш имкониятини кўриб чиқмоқда.

Эслатиб ўтамиз, чехияликлар учун 25 февралдан бошлаб одам гавжум жойларда респиратор, нанониқоб ёки бирданига иккита тиббий ниқоб тақиш мажбурияти жорий этилади.

Чехия соғлиқни сақлаш вазири Ян Блатнига кўра, бу тартиб коронавируснинг «британча» штамми кенг тарқалиши билан боғлиқ. Янги талаб, хусусан, дўконлар, касалхоналар, жамоат транспорти ва бекатларга нисбатан қўлланилади.

Аввалроқ Чехия ҳукумати коронавирус пандемияси олдида ожиз қолаётганини тан олган эди — мамлакатдаги тақиқлар амалда бекор бўлган, аҳоли уларга бўйсунишни истамаяпти.