Suzuki Motor Corporation директорлар кенгашининг 91 ёшли раиси Осаму Сузуки июнь ойида бўлиб ўтадиган директорлар кенгашининг умумий йиғилишидан кейин лавозимини тарк этади. Бу ҳақда компания пресс-релизига таяниб Kyodo агентлиги хабар тарқатди.
Осаму Сузукининг 43 йиллик раҳбарлик даврида компания автомобиль ишлаб чиқарувчилар дунё бозорида глобал даражадаги иштирокчига айланган. Компания раҳбариятидаги ўзгаришлардан кейин 91 ёшли бизнесмен катта маслаҳатчи лавозимини эгаллайди.
Осаму Сузукининг ўғли Тосихиро Сузуки 2015 йилдан буён гуруҳ президенти лавозимини эгаллаб келаётганди ва у отасидан кейин компанияни бошқаради.
Осаму Сузуки Suzuki Motor Corporation тизимига 1958 йилда келган ва у ерда турли лавозимларда ишлаган, жумладан, энг қуйи бўғиндан энг юқори ўрингача кўтарилган. У Suzuki Motor Corporation асосчиси Мичио Сузукининг невараси Шоко Сузукига уйланганидан кейин рафиқасининг фамилиясини олган. Бунга Сузукилар оиласида эркак меросхўрнинг йўқлиги сабаб бўлган. Осаму Сузуки фамилиясини олгунига қадар унинг шарифи Мацуда бўлган.
1963 йилда у директорлик лавозимига кўтарилади. Орадан тўрт йил ўтгач, кичик бошқарувчи директор, 1972 йилда катта бошқарувчи директорлик курсисига чиқади. 1978 йилда Осаму президентлик лавозимига кўтарилди ва корпорациянинг бош ижрочи директорига айланди. 2000 йилда у бош директорликни ташлаб, Suzuki Motor Corporation’нинг директорлар кенгашига раҳбарлик қилишни бошлаган.
Аввал Осаму Сузуки компаниянинг 100 йиллик юбилейи муносабати билан директорлар кенгаши раислигидан кетишини эълон қилганди. У ўзидан кейинги авлодга имконият бериб, компаниянинг ўрта тезликдаги бизнес-режасини амалга ошириш лозимлигини таъкидлаган.
Режага кўра, компания 2025-молия йилида сотувлар ҳажмини 4,8 триллион иенага етказиши ва 2019-молия йилидаги 3,49 триллион иена кўрсаткичидан ўзиб кетиши керак. Шунингдек, компания 2025 йилда автомобилларни электрлаштириш жараёнини ҳам жадаллаштиришни кўзда тутган.
Изоҳ (0)