Буюк Британияда аниқланган коронавируснинг юқумлироқ тури ўтган ҳафта давомида яна еттита мамлакатда аниқланди. Бу ҳақда Жаҳон соғлиқни сақлаш ташкилоти (ЖССТ) ўзининг ҳафталик ахборотномасида маълум қилди, деб ёзмоқда «РБК».
«16 февралда ўтказилган сўнгги янгиланишдан бери коронавируснинг ‘британча’ штамми яна еттита мамлакатда қайд этилди. 23 февраль ҳолатига кўра, жами 101 та мамлакат касаллик ўз ҳудудларига олиб кирилгани ҳақида маълум қилган», — дейилади ҳужжатда.
Бундан ташқари, Жанубий Африкада пайдо бўлган штаммнинг тарқалиш географияси ҳам кенгайган. Сўнгги бир ҳафта ичида «африкача» штамм яна бешта мамлакатда аниқланган ва мазкур штамм қайд этилган мамлакатлар сони жами 51 тага етган. ЖССТ ушбу штаммдаги мутациялар вируснинг иммунитет тизими таъсиридан қочишга ёрдам беришини таъкидлади. Шунинг учун, мазкур штамм аввал COVID-19 билан касалланган ёки коронавирусга қарши эмланганлар учун ҳам хавфлидир.
Бразилияда ва Японияда пайдо бўлган штаммлар эса яна саккизта давлатда қайд этилган. Умумий ҳисобда ушбу штаммлар 29 та мамлакатда аниқланган.
Маълумот учун, олимлар коронавируснинг Буюк Британияда аниқланган штамми инфекциянинг асл шаклига қараганда хавфлироқ эканлигини маълум қилган. Янги штаммнинг ўлимга олиб келиш даражаси 30-70 фоиздан кўп, одамдан одамга юқиш даражаси эса 35-45 фоизга юқорироқ, дейилган.
Эслатиб ўтамиз, «Росздравнадзор» (Россия соғлиқни сақлаш соҳасидаги назорат бўйича федерал хизмати) коронавируснинг «британча» штаммида учрайдиган иккита мутацияни аниқлаш учун Россиядаги биринчи тест тизимини рўйхатдан ўтказди.
SARS-CoV-2 вирусининг «британча» мутацияларини аниқлаш учун янги тест тизими Россия Соғлиқни сақлаш вазирлигининг Кулаков номидаги Акушерлик, гинекология ва перинатология миллий тадқиқот маркази томонидан «ДНК-технологиялар» компанияси билан ҳамкорликда яратилган.
Изоҳ (0)