Қозоғистон ҳукумати коронавирус тарқалиши учун қулай эпидемик вазиятга эга бўлган республиканинг қатор минтақаларида карантин чекловларини 1 мартдан юмшатиш тўғрисида қарор қабул қилди. Бу ҳақда 24 февраль, чоршанба куни идоралараро комиссия йиғилиши якунлари бўйича ҳукумат матбуот хизмати маълум қилди, дея хабар қилмоқда «ТАСС».
«Коронавирус тарқалиши бўйича етти кун кетма кет ‘яшил ҳудуд’ бўлиб қолган минтақаларда 1 мартдан бошлаб жорий қилинган чекловлар юмшатилади. Бунда цирк, билярд клублари, болалар кўнгилочар марказлари (бинонинг банд бўлиши 30 фоиздан ошмаслик шарти билан), спорт тадбирлари (30 фоизлик чеклов билан), жума намози (30 фоизлик чеклов билан) ва маракаларга (30 фоизлик чеклов билан, 50 кишидан кўп бўлмаган ҳолда) рухсат берилади», — дейилади хабарда.
Мамлакатнинг етти кун давомида «сариқ» ҳудуд бўлган минтақаларида якшанба кунлари ёпиқ бинодаги озиқ-овқат ва ноозиқ-овқат бозорлари, савдо ҳамда кўнгилочар марказлари, савдо уйлари ва тармоқлари ишлашига рухсат берилади.
Шунингдек, комиссия Туркия (тўртта рейсга), Ўзбекистон (тўртта рейсга), Қирғизистон (иккита рейсга) ва Украина (битта рейсга) билан халқаро авиапарвозлар сонини кўпайтириш бўйича таклифни маъқуллади.
Бундан ташқари, 1 мартдан бошлаб мактаб ўқувчиларининг биринчи синфдан бешинчи синфгача, халқаро мактабларда — биринчи синфдан еттинчи синфгача бўлган ўқувчиларини бирлаштиришга рухсат беришга қарор қилинди. Манғистов, Костанай, Жамбил вилоятлари бундан мустасно. Мониторинг текшируви натижаларига кўра, юқоридаги ҳудудларда энг кўп санитария режимининг бузилиши қайд этилган.
Қозоғистоннинг бош давлат санитария шифокори Ерлан Киясов 24 февраль куни бўлиб ўтган брифингда республикада эпидемик вазият оптимистик сценарий бўйича ривожланиб бораётганини айтди. Шунингдек, у илгари пессимистик прогнозларга кўра, COVID-19 билан касалланишнинг энг юқори даражаси март ойининг охири ва апрель ойининг бошларида кутилганини эслади.
«Мавжуд вазиятдан келиб чиқиб, биз илгари белгиланган ушбу ‘чўққини’ четлаб ўтамиз, деб тахмин қилишимиз мумкин», — деди Киясов.
Бундан аввал Қозоғистон ўз ҳудудида ишлаб чиқарилган «Спутник V» вакцинасини рўйхатдан ўтказгани, Абдулазиз Комилов Қозоғистон президенти билан учрашиб, унга Шавкат Мирзиёевнинг мактубини топширгани ҳамда Қозоғистонда Наврўз байрамини 10 кун нишонлаш таклиф этилаётгани ҳақида хабар берилганди.
Изоҳ (0)