Қирғизистон президенти Садир Жапаров расмий ташриф билан Ўзбекистонга келади. Бу ҳақда Қирғизистон ТИВ матбуот хизмати хабар берди.
22 февраль куни Қирғизистон ташқи ишлар вазирининг биринчи ўринбосари Нуран Ниёзалиев ва Ўзбекистон ташқи ишлар вазирининг биринчи ўринбосари Фарҳод Арзиев иштирокидаги видеоконференсалоқада ташрифга тайёргарлик кўриш ва уни ўтказиш масалалари муҳокама қилинган.
Ташриф қачон бўлиб ўтишига аниқлик киритилмаган. Бугун, 24 февраль куни Садир Жапаров Қирғизистон президенти сифатидаги илк расмий ташриф билан Россияга учди.
Қирғизистонда 10 январь куни бўлиб ўтган муддатидан олдинги президент сайловларида ғолиб чиққач, Садир Жапаров ўзининг илк хорижий ташрифини Россияга уюштириши ҳақида бош вазир ўринбосари Равшан Собиров мамлакат парламентидаги нутқида маълум қилган эди. Февраль ўрталарида эса Жапаров Россияга ташриф учун тайёргарлик доирасида ўз-ўзини яккалаш режимига ўтгани ҳақида хабар берилганди.
Қирғизистон ва Ўзбекистон ТИВ ўринбосарлари музокарада, шунингдек, ҳар икки мамлакат ўртасидаги қонунчилик базасини инвентаризация қилиш, Ўзбекистон ТИВ раҳбари Абдулазиз Комиловнинг бўлажак ишчи ташрифи ва бошқа масалаларни ҳам муҳокама қилган.
Изоҳ (0)