Сардоба сув омбори тошқинидан фойда кўрмоқчи бўлган фирибгарга суд ҳукми ўқилди, деб хабар беради «Сирдарё хабарлари» нашри.
Маълум бўлишича, муқаддам фирибгарлик жинояти учун судланиб жазо ўтаётган М.П. Сардоба туманидаги мактабларга эвакувация қилинган фуқароларга ёрдам бериш учун кўнгилли сифатида қўшилган.
У 2020 йил июль ойида эвакуация қилинган аҳолини ноозиқ-овқат маҳсулотлари билан таъминлаш баҳонаси билан ўзини Сардоба тумани «Қизил яримой» жамияти биринчи ўринбосари сифатида таништирган. Сўнг ушбу жамият номидан сохта талабнома тўлдириб, маҳсулотлар сақланадиган омборга тақдим қилган ва у ердан 15 турдаги 15,154 миллион сўмлик маҳсулотларни олиб, бир неча фуқарога сотиб юборган.
Ўтказилган тадбирлар давомида М.П. ҳуқуқни муҳофаза қилувчи орган томонидан ушланиб, Жиноят кодексининг 168-моддаси (фирибгарлик) 3-қисми «б» банди ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 1-қисми билан жиноят иши қўзгатилган.
Мазкур жиноят иши суд томонидан кўриб чиқилиб, ушбу шахсга нисбатан 3,5 йил озодликдан маҳрум қилиш жазоси тайинланган.
Эслатиб ўтамиз, Сирдарё вилоятидаги Сардоба сув омборида 2020 йил 1 май куни эрталаб тўғон ўпирилиши содир бўлди. Сув тошқини оқибатида Сардоба, Оқолтин ва Мирзаобод туманларидаги аҳоли пунктлари ва экинларга зарар етди. Бинолар, йўллар, коммуникациялар вайрон бўлди. Учта тумандаги 22 та қишлоқдан 60 мингдан ортиқ аҳоли эвакуация қилинди.
Изоҳ (0)