Бугун,

  • USD 10940.05
  • RUB 182.26
  • EUR 11121.65

Парранда гриппининг одамга юқиши билан боғлиқ биринчи ҳолат Россияда аниқланди, деб хабар беради «Интерфакс» «Роспотребнадзор» (Истеъмолчилар ҳуқуқларини ҳимоя қилиш ва инсон фаровонлиги соҳасидаги назорат бўйича федерал хизмат) раҳбари Анна Поповага таяниб.

Фото: «ТАСС»

Фото: «ТАСС»

«Бугун мен Россия ‘Роспотребнадзор’нинг ‘Вектор’ илмий маркази олимлари томонидан амалга оширилган муҳим бир кашфиёт ҳақида маълум қилмоқчиман: одамнинг А гриппи, А(H5N8) парранда гриппи вирусини юқтириб олиши билан боғлиқ биринчи ҳолат лаборатория шароитида тасдиқланди», — деди Попова «Россия-24» телеканалидаги брифингда.

Попованинг аниқлик киритишича, вирус Россия жанубидаги парранда фабрикасининг етти нафар ходимида қайд этилган, у ерда 2020 йил декабрида бир бош паррандалар орасида парранда гриппи авж олган эди.

Унинг сўзларига кўра, касаллик уларда енгил формада кечган, хавфлар «минималлаштирилган, вазият ундан кейин ривожланмаган», касалланиб ўтган қушларнинг ҳолати яхши.

«Вирус қушдан одамга юқишга қодир, турлараро тўсиқ енгиб ўтилди. Аммо бугунги кунда грипп вирусининг ушбу вариант одамдан одамга юқмайди. Кейинги мутациялар ушбу тўсиқни ҳам қанчалик тез енгиб ўтишини вақт кўрсатади», — деди Попова.

Унинг таъкидлашича, вирус эрта босқичда аниқлангани сабабли унинг эҳтимолий мутацияларига тайёрланиш, одамдан одамга юқишга қодир бўладиган вақтгача тест тизимларини ва вакцина платформаларини ишлаб чиқиш учун вақт бор.

«Одамнинг биринчи марта янги А (H5N8) гриппи билан касалланиши борасидаги маълумотлар Жаҳон соғлиқни сақлаш ташкилоти (ЖССТ)га юборилди. Бу бир неча кун аввал натижаларга тўлиқ ишонч ҳосил қилганимиздан кейин содир бўлди. ‘Вектор’ GISAID халқаро базасига А(H5N8) вирусини тўлиқ геномли секвенлаш (кетма-кетлигини аниқлаш) маълумотларини киритди», — деди Попова.

Ноябрь ойида «Вектор» илмий маркази Россиянинг 15 та ҳудудида ёввойи ва уй паррандалари орасида H5N8 гриппининг янги вируси айланаётганини маълум қилган, аммо ўшанда вирус одам учун хавфли эмасди.

ЖССТ маълумотларига кўра, шу пайтгача одамга парранда гриппининг А(H5N1), А(H7N9) ва А(H9N2) вируслари ҳамда чўчқа гриппи вирусининг А(H1N1), А(H1N2) ва (H3N2) турлари юқиши ҳолатлари бўлган.

«Вектор» илмий маркази парранда гриппининг янги А(H5N8) турига қарши вакциналар ва тест тизимлари ишлаб чиқишга киришишга тайёрлигини маълум қилди.

«Юқори патогенли парранда гриппи авж нуқтасининг бундай тезкорлик билан расшифровка қилиниши бугуноқ одамда касалланиш ҳолатини тезкорлик билан аниқлаш ва даволашни бошлаш ҳақида қарор қабул қилиш имконини берувчи тест тизимларини ишлаб чиқишга киришиш имконини беради», — деди марказ раҳбари Ринат Максютов. «Шунингдек, номзод вакцина штаммини яратиш ишларини бошлаш имконини ҳам», — дея қўшиб қўйди у.

ЖССТ вакили Тарик Яшаревич маълум қилишича, ташкилот Россия ҳукумати томонидан Халқаро тиббий-санитария қоидалари механизми орқали одамларнинг H5N8 парранда гриппи билан касалланиши ҳолати ҳақида хабардор қилинган. Унинг таъкидлашича, агар ҳолат тасдиқланса, бу одамнинг H5N8 билан касалланиши билан боғлиқ биринчи вазият бўлади. Ҳодисанинг Россия ва бошқа мамлакатлар аҳолиси учун хавфларини баҳолаш мақсадида ташкилот маълумот йиғмоқда, деди у.

Изоҳ
Асосий янгиликлар