Украина Миллий хавфсизлик ва мудофаа кенгаши (МХМК) томонидан Олий Рада депутати ва «Мухолифат платформа — Ҳаёт учун» партияси етакчиси, «Путиннинг отаси» номи билан танилган Виктор Медведчукка қарши санкциялар жорий қилинди. Бу ҳақда МХМК котиби Алексей Даниловга таяниб, Meduza хабар берди.
Алексей Даниловнинг сўзларига кўра, Медведчук ва унинг турмуш ўртоғи Оксана Марченко уч йил муддатга санкциялар жорий қилинган саккиз кишилик рўйхатга киритилди. Шунингдек, ушбу рўйхатдан 19 та юридик шахс ҳам ўрин олган. Чекловлар Украина Хавфсизлик хизматининг (СБУ) терроризмни молиялаштириш бўйича суриштирув ишлари билан боғлиқ.
Хусусан, санкцияларда Медведчук ва Марченконинг активларини гаровга олиш кўзда тутилган. Данилов рўйхатнинг тўлиқ таркибини очиқламади. Унинг таъкидлашича, таркиб Украина президенти Владимир Зеленский фармони матнида тўлиқ эълон қилинади. Мамлакат президенти сайтида ҳозирча бундай фармон мавжуд эмас.
«Ҳозирча бу масалани ўрганяпмиз», — деди партия раисдоши Юрий Бойко МХМК қарори ҳақида «РБК» нашрига берган изоҳида.
Январь ойи охирида Украина президенти Владимир Зеленский МХМКнинг Россиянинг юридик ва жисмоний шахсларига қарши якка тартибда санкциялар киритиш қарорини кучга киритган эди.
Шунингдек, Украина Россиянинг «Спутник V» вакцинасини рўйхатдан ўтказишдан бош тортган. Украина соғлиқни сақлаш вазири Максим Степановнинг айтишича «қайсидир сиёсий куч Россия вакцинасини рўйхатдан ўтказиш масаласида қандайдир васваса келтириб чиқарган», аммо Киев «Спутник V»ни рўйхатдан ўтказмайди.
Аввалроқ Европа Иттифоқи Беларусга қарши тўртинчи санкциялар пакетини ишлаб чиқаётгани ва россиялик мухолифатчи Александр Навальнийнинг қамоққа олинишига алоқадорларга нисбатан чекловлар жорий этишни назарда тутувчи «Навальний рўйхати» муҳокама қилинаётгани ҳақида хабар берилганди.
Изоҳ (0)