Тахминан 10 миллион аҳоли яшайдиган Индонезия пойтахти Жакарта мазкур ҳудудга кириб келган мавсумий муссон нам шамоли оқибатида сув тошқини остида қолди. Бу ҳақда «Интерфакс» хабар қилди.
«Ёмғир тўхтаган, бироқ Жакарта кўчаларида ҳанузгача бошқа ҳудудларга қараганда кўпроқ сув сақланиб қолган. Тошқинлар шаҳар марказига таъсир қилмаган ва сув ҳудуддан чиқарилганидан кейин одамлар яна ўз уйларига қайтиши мумкин», – деган Жакарта губернатори Анис Басведан.
Қутқарувчилар шаҳарнинг жанубий ва шарқий қисмидан 1,3 минг нафар аҳолини сув сатҳи 1,8 метрга кўтарилгани туфайли эвакуация қилган. Шаҳарда 20 га яқин эвакуация марказлари фаолиятини бошлаган. Табиий офат оқибатида ҳалок бўлганлар ҳақида ахборот берилмаган.
Синоптикларнинг прогнозига кўра, яқин кунларда Индонезия пойтахтида мавсумнинг энг кучли ёмғири ёғиши мумкин. Келаси ҳафтада шаҳарда кучли ёмғирлар, момақалдироқ ва кучли шамол бўлиши кутилмоқда. Ёмғирлар мавсуми февраль охири ёки март бошигача давом этади.
Индонезияда табиат инжиқликлари билан биргаликда COVID-19 коронавирусининг эпидемияси ҳам давом этмоқда. Индонезия Жануби-Шарқий Осиё мамлакатлари орасида COVID-19’дан энг кўп азият чекаётган ҳудудлардан бири, шунингдек ушбу давлатда иқтисодий танглик ҳам кузатилмоқда.
Мавзуга доир: Коронавирусга қарши эмланишдан бош тортганлар Ватиканда ишдан ҳайдалади, Индонезияда эса жаримага тортилади
Изоҳ (0)