Rossiyada odamga H5N8 parranda grippi yuqishi bilan bog‘liq birinchi holat tasdiqlandi. JSST vaziyatni o‘rganmoqda

Parranda grippining odamga yuqishi bilan bog‘liq birinchi holat Rossiyada aniqlandi, deb xabar beradi “Interfaks” “Rospotrebnadzor” (Iste’molchilar huquqlarini himoya qilish va inson farovonligi sohasidagi nazorat bo‘yicha federal xizmat) rahbari Anna Popovaga tayanib.

“Bugun men Rossiya ‘Rospotrebnadzor’ning ‘Vektor’ ilmiy markazi olimlari tomonidan amalga oshirilgan muhim bir kashfiyot haqida ma’lum qilmoqchiman: odamning A grippi, A(H5N8) parranda grippi virusini yuqtirib olishi bilan bog‘liq birinchi holat laboratoriya sharoitida tasdiqlandi”, — dedi Popova “Rossiya-24” telekanalidagi brifingda.

Popovaning aniqlik kiritishicha, virus Rossiya janubidagi parranda fabrikasining yetti nafar xodimida qayd etilgan, u yerda 2020-yil dekabrida bir bosh parrandalar orasida parranda grippi avj olgan edi.

Uning so‘zlariga ko‘ra, kasallik ularda yengil formada kechgan, xavflar “minimallashtirilgan, vaziyat undan keyin rivojlanmagan”, kasallanib o‘tgan qushlarning holati yaxshi.

“Virus qushdan odamga yuqishga qodir, turlararo to‘siq yengib o‘tildi. Ammo bugungi kunda gripp virusining ushbu variant odamdan odamga yuqmaydi. Keyingi mutatsiyalar ushbu to‘siqni ham qanchalik tez yengib o‘tishini vaqt ko‘rsatadi”, — dedi Popova.

Uning ta’kidlashicha, virus erta bosqichda aniqlangani sababli uning ehtimoliy mutatsiyalariga tayyorlanish, odamdan odamga yuqishga qodir bo‘ladigan vaqtgacha test tizimlarini va vaksina platformalarini ishlab chiqish uchun vaqt bor.

“Odamning birinchi marta yangi A (H5N8) grippi bilan kasallanishi borasidagi ma’lumotlar Jahon sog‘liqni saqlash tashkiloti (JSST)ga yuborildi. Bu bir necha kun avval natijalarga to‘liq ishonch hosil qilganimizdan keyin sodir bo‘ldi. ‘Vektor’ GISAID xalqaro bazasiga A(H5N8) virusini to‘liq genomli sekvenlash (ketma-ketligini aniqlash) ma’lumotlarini kiritdi”, — dedi Popova.

Noyabr oyida “Vektor” ilmiy markazi Rossiyaning 15 ta hududida yovvoyi va uy parrandalari orasida H5N8 grippining yangi virusi aylanayotganini ma’lum qilgan, ammo o‘shanda virus odam uchun xavfli emasdi.

JSST ma’lumotlariga ko‘ra, shu paytgacha odamga parranda grippining A(H5N1), A(H7N9) va A(H9N2) viruslari hamda cho‘chqa grippi virusining A(H1N1), A(H1N2) va (H3N2) turlari yuqishi holatlari bo‘lgan.

“Vektor” ilmiy markazi parranda grippining yangi A(H5N8) turiga qarshi vaksinalar va test tizimlari ishlab chiqishga kirishishga tayyorligini ma’lum qildi.

“Yuqori patogenli parranda grippi avj nuqtasining bunday tezkorlik bilan rasshifrovka qilinishi bugunoq odamda kasallanish holatini tezkorlik bilan aniqlash va davolashni boshlash haqida qaror qabul qilish imkonini beruvchi test tizimlarini ishlab chiqishga kirishish imkonini beradi”, — dedi markaz rahbari Rinat Maksyutov. “Shuningdek, nomzod vaksina shtammini yaratish ishlarini boshlash imkonini ham”, — deya qo‘shib qo‘ydi u.

JSST vakili Tarik Yasharevich ma’lum qilishicha, tashkilot Rossiya hukumati tomonidan Xalqaro tibbiy-sanitariya qoidalari mexanizmi orqali odamlarning H5N8 parranda grippi bilan kasallanishi holati haqida xabardor qilingan. Uning ta’kidlashicha, agar holat tasdiqlansa, bu odamning H5N8 bilan kasallanishi bilan bog‘liq birinchi vaziyat bo‘ladi. Hodisaning Rossiya va boshqa mamlakatlar aholisi uchun xavflarini baholash maqsadida tashkilot ma’lumot yig‘moqda, dedi u.