Британия шаҳзодаси Гарри ва унинг рафиқаси Меган Маркл Буюк Британия қироллик оиласи аъзолари сифатида ўзларининг расмий вазифаларига қайтмаслигини тасдиқлади. Бу ҳақда Букингем саройи — Буюк Британия қироличаси Елизавета II’нинг расмий қароргоҳи хабар қилди.
Сассекс герцоги ва герцогиняси қирол оиласи аъзолари сифатида ҳомийлик қилган хайрия ташкилотлари ҳомийлигидан воз кечиши керак. Шунингдек, шаҳзода Гарри ўзининг фахрий ҳарбий унвонларидан, хусусан, Буюк Британия қироллик денгиз пиёдалари генерал-капитани унвонидан маҳрум қилинади.
«Ҳамма уларнинг қароридан хафа бўлса-да, герцог ва герцогиня (қироллик) оиласининг севимли аъзолари бўлиб қолади», — дейилади Букингем саройи баёнотида.
Ўз навбатида, Сассекс герцог ва герцогиняси вакили жуфтлик Буюк Британия ва дунё хизматига содиқ қолишини ҳамда расмий мақомларидан қатъи назар, улар ҳомийлик қилган ташкилотларга ўзларининг чексиз ёрдамларини таклиф қилишини билдирган.
Эслатиб ўтамиз, 2020 йил январь ойида шаҳзода Гарри ва унинг рафиқаси Меган қироллик ваколатларидан воз кечишларини эълон қилди. Улар расмий равишда Британия қироллик оиласи вакили бўлишдан ва ҳукумат томонидан маблағ олишни тўхтатди. Шу билан бирга, қироллик оиласи уларга бир йилдан сўнг ушбу шартномаларни ўзгартириш имкониятини тақдим этди.
Меган ва Гарри қироллик ваколатларидан воз кечгач, аввал Канадага, сўнгра АҚШга кўчиб ўтди. Улар Spotify ва Netflix стрим хизматлари билан шартномалар тузди. Яқинда жуфтлик иккинчи фарзандини кутаётганини эълон қилди. 7 март куни CBS телеканали телебошловчиси Опра Уинфри жуфтлик билан интервьюни эфирга узатади.
Изоҳ (0)