Ирландияда COVID-19 касаллиги сабабли энг юқори даражадаги чекловлар апрель ойининг охиригача давом этиши мумкин, деб хабар берди мамлакат бош вазири Микал Мартинга асосланиб Irish Mirror.
Барлар, ресторанлар ва сартарошхоналарнинг очилиши узоқроқ вақт талаб қилиши мумкин. «Ўйлайманки, биз бу ҳақдаги қарорни, агар ундан аввал бўлмаса, иккинчи чоракнинг охирида чиқарамиз», — деди бош вазир ва аниқ санани айтишдан бош тортди.
Унинг қўшимча қилишича, ушбу локдаун бир қатор омиллар, жумладан, вируснинг «ўта юқумли ва хавфли» варианти ва эмлаш бошланиши сабабли аввалгиларидан фарқ қилади. Унинг сўзларига кўра, энди COVID-19’нинг «британча» штамми Ирландияда аниқланган барча ҳолатларнинг, тахминан, 90 фоизида учрамоқда.
Вакцинация масаласида расмийлар ирландияликларнинг кўпчилигини сентябргача, 70 ёшдан ошган барча аҳолини эса май ойига қадар эмлашни режалаштирмоқда.
Маълумотларга кўра, пандемия бошланганидан бери Ирландияда 212 мингдан ортиқ одам коронавирус билан касалланган, 4 мингдан ортиғи вафот этган.
Маълумот учун, Ирландияда коронавирус пандемияси сабаб эълон қилинган локдаун апрелгача узайтирилганди.
Бундан аввал Швецияда коронавирус сабаб жорий қилинган чекловлар 7 мартга қадар узайтирилгани ҳамда Туркия ва Швейцарияда март ойидан бошлаб COVID-19 чекловлари юмшатилиши ҳақида хабар берилганди.
Изоҳ (0)