Буюк Британия бош вазири Борис Жонсон 19 февраль, жума куни бўлиб ўтадиган G7 мамлакатлари раҳбарларининг виртуал саммитида ҳукуматларни пайдо бўлаётган касалликларга қарши вакциналарни ишлаб чиқаришни жадаллаштиришга қаратилган саъй-ҳаракатларни қўллаб-қувватлашга чақиради, дея хабар бермоқда «Интерфакс».
«Бош вазир бугун янги вакциналарни ишлаб чиқариш вақтини учдан икки қисмга, яъни юз кунгача қисқартириш бўйича ўз режасини эълон қилади», — дейилади Британия ҳукуматининг веб-сайтида чоп этилган пресс-релизда.
«Тахминан, 300 кун ичида коронавирусга қарши вакцина ишлаб чиқиш — бу улкан ва мисли кўрилмаган глобал ютуқ. Янги пайдо бўлаётган касалликлар учун янги вакциналар ишлаб чиқариш вақтини янада қисқартириш орқали биз ҳозирги инқирознинг саломатлик, иқтисодий ва ижтимоий соҳаларга бўлган таъсирининг олдини оламиз», — дейилади ҳужжатда.
Даунинг-стритнинг хабар беришича, бош вазир Буюк Британия ҳукуматининг илмий маслаҳатчиси Патрик Валлансдан Жаҳон соғлиқни сақлаш ташкилоти (ЖССТ) ва Эпидемияга тайёргарлик бўйича инновациялар коалицияси (CEPI), шунингдек, саноат ва илмий экспертлар билан биргаликда кенг тарқалган патогенлар учун вакциналар, даволаш усуллари ва тестларини ишлаб чиқаришни жадаллаштириш бўйича тавсиялар ишлаб чиқишни сўраган.
Қайд этилишича, Буюк Британия келажакда ишлаб чиқариладиган вакциналарнинг катта қисмини COVAX орқали етказиб беради. Бу даромад даражасидан қатъи назар, барча мамлакатлар учун COVID-19 коронавирус вакциналарига тенг равишда эга бўлиш имконини беради.
Буюк Британиянинг соғлиқни сақлаш вазири Мэтт Ҳэнкок бош вазирнинг ташаббусини қўллаб-қувватлаган.
«Бош вазир тўғри айтмоқда. Биз янги вакциналарни ишлаб чиқариш вақтини учдан икки қисмга, яъни 100 кунгача қисқартиришга ҳаракат қилишимиз керак», — деб ёзган Ҳэнкок ўз Twitter’ида.
Бундан аввал Борис Жонсон Шимолий Ирландия учун вакциналарни экспорт қилишга қўйилган тақиқни Европа комиссияси раҳбари билан муҳокама қилгани ҳамда Британия ҳукумати ўзини ўзи изоляция қилган фуқароларга пул тўлаши мумкинлиги ҳақида хабар берилганди.
Изоҳ (0)