Зимбабве аҳолисини коронавирусга қарши Хитойнинг Sinovac компанияси томонидан ишлаб чиқилган вакцина билан эмлашни бошлади. Бу ҳақда «Korrespondent.net» хабар берди.
Хабарга кўра, Хитой ҳукумати ушбу Африка давлатига 200 минг доза вакцина хайрия қилган. Ўз навбатида Зимбабве март ойида етказиб берилиши келишилган 800 минг дозага яқин қўшимча вакцина сотиб олган.
Биринчи босқичда вакцина шифокорлар, давлат амалдорлари, 60 ёшдан ошганлар ва бошқа хавф остидаги гуруҳ вакилларига берилади.
Шунингдек, эмлашнинг ушбу босқичида Sinovac препарати коронавируснинг Жанубий Африкада пайдо бўлган ҳамда Зимбабведа тарқалган мутациясига қарши қанчалик самарали экани ҳақидаги саволга жавоб бериши керак.
Зимбабве ахборот вазири Моника Музвангвининг сўзларига кўра, биринчи босқичда ҳукумат аҳолининг 22 фоизини эмлашни режалаштирмоқда. Иккинчи ва учинчи босқичларнинг ҳар бирида 18,4 фоиздан аҳоли эмланади. Шу тарзда, мақсад қилинганидек, аҳолининг деярли 60 фоизи эмланади. Умумий ҳисобда Зимбабведа 16 миллионга яқин одам яшайди.
2021 йил 18 февраль ҳолатига кўра, Зимбабведа COVID-19 билан касалланганлар сони 35 мингдан ошган, камида 1,4 минг киши вафот этган, 31 мингдан ортиқ бемор соғайган.
Аввалроқ Венесуэлада аҳолини «Спутник V» вакцинаси билан эмлаш бошлангани ҳақида хабар берилганди. 2020 йил ноябрь ойида Венесуэлада «Спутник V» синовдан ўтказилган. Синовда 2 минг киши, шу жумладан, мамлакат президентининг ўғли Мадуро Герра ва унинг опаси Мария Тереза иштирок этган.
Конго давлатида эса Эбола касаллигига қарши эмлаш кампанияси расман бошлангани маълум қилинган. Хабарга кўра, вакцинани Эбола касаллигидан илк бемор даволаниб чиққан Матанда шифохонасининг тиббиёт ходимлари қабул қилган.
Изоҳ (0)