Февраль ойининг бошида ҳарбий тўнтариш содир бўлган Мьянмада Wikipedia интернет-энциклопедияси блокланди. Бу ҳақда NetBlocks нотижорат ташкилоти Twitter’да маълум қилди, деб ёзмоқда «РБК».
Мамлакатда онлайн энциклопедиянинг барча тилдаги версиялари ишдан чиққан. Бунгача Facebook, Instagram, WhatsApp блокланган эди. Бундан ташқари, Мьянмада кетма-кет олтинчи кеча Интернет вақти-вақти билан ишламоқда. 14 февралда эса у деярли тўлиқ узиб қўйилган эди. Бунга мамлакатнинг йирик шаҳарларида давлат тўнтаришига қарши давом этаётган норозилик намойишлари сабаб бўлган.
Шунингдек, Мьянма ҳарбийлари намойишларга қарши мамлакатнинг энг йирик шаҳри Янгон кўчаларига зирҳли машиналарни киритган. Мамлакат Марказий банки ёнида аскарлар, зирҳли транспортёрлар, тартибсизликни назорат қилиш бўлинмалари ва сув пуркагичлари бўлган юк машиналари пайдо бўлган. Шунга қарамай, шаҳарнинг ушбу ҳудудида 1000 дан ортиқ намойишчилар тўпланган.
Аввалроқ ҳукумат тўнтарилиши пайтида ҳарбийлар томонидан ҳибсга олинган Мьянма президенти У Вин Минт президент саройидан бошқа бинога кўчирилгани ҳақида хабар берилганди. Хабарга кўра, унинг қаердалиги номаълум.
Шунингдек, тўнтариш вақтида ҳибсга олинган давлат маслаҳатчиси Аун Сан Су Чжига қарши 16 февраль куни иккинчи айблов эълон қилинган. Таъкидланишича, эндиликда Аун Сан Су Чжи фавқулодда вазиятлар тўғрисидаги қонунни бузганликда айбланмоқда. Биринчи марта 3 февраль куни давлат маслаҳатчиси импорт ва экспорт тўғрисидаги қонунни бузганликда айбланган эди.
Изоҳ (0)