АҚШ жанубида яшовчи аҳоли бир ҳафтадан буён мазкур ҳудуд учун анчайин ноодатий бўлган жуда совуқ об-ҳаво асоратларига қарши кураш олиб бормоқда. Ҳаво ҳарорати 18 даражагача тушиб кетган. Камида 47 нафар одам совуқ оқибатида ҳалок бўлган, 4 миллиондан зиёд уй хўжаликлари иссиқлик ва электр энергияси таъминотидан узилиб қолган. «РБК»нинг фоторепортажида АҚШ жанубидаги қаҳратон оқибатида яшаб қолиш учун курашаётган одамлар ҳақида билиб олиш мумкин.
Техасда охирги 30 йил ичидаги энг паст ҳарорат қайд этилди (симоб устуни -18 даражагача тушиб кетган) ва фавқулодда ҳолат эълон қилинди. Ҳавонинг кескин совиши туфайли электр энергияси таъминоти тизимида катта узилишлар қайд қилинди.
Блекаут Техасдаги камида 4,3 миллионта уй ва офисларга таъсир қилган. 19 февраль ҳолатига кўра, штатдаги 200 мингта уй хўжалиги электр таъминотидан узилган. 13 миллион нафар техасликлар иссиқ сувсиз қолган.
Электр энергиясидаги муаммолардан ташқари, Техасда озиқ-овқат маҳсулотларини етказиб бериш билан боғлиқ хизматларида ҳам тўхталишлар учраган.
Камида 47 нафар одам ноқулай об-ҳавонинг қурбонига айланди, шундан 30 нафари Техас штатининг фуқароларидир. The Washington Post нашрининг ёзишича, мазкур рақамга совуқда қолиб кетиб вафот этганлар ёки ўлимига шундай гумон билан тахминий ташхис қўйилган одамлар киритилган.
19 февралда электр тизимларида узилишлар кузатилгани туфайли ҳукумат Мексика кўрфази соҳиллари яқинидаги Галвестон ҳамда Корпус-Кристи шаҳарларига захира озиқ-овқатлар ортилган иккита ҳарбий самолёт юборишга мажбур бўлди.
Техас расмийлари об-ҳавонинг бундай кескин совиб кетиши яна ҳам жиддий оқибатлар олиб келиши мумкин бўлганини қайд этган. Шунингдек, улар аномал иқлим совиши ва кучли қор бўронига олдиндан тайёргарлик кўрилмаганини ҳам тан олган.
Оклахомада кузатилган кучли совуқ иқлим, қор бўронлари ва муз ёмғирлари губернаторни федерал даражада ёрдам сўрашга мажбур қилди.
19 февралда мамлакат жанубида ҳавонинг бир оз бўлса ҳам, илигани сезилган, музлаган ерлар аста-секин эриши, ҳаво ҳарорат кўтарилиши ва 10 даража илиққача чиқиши кутилмоқда. Шу куни музли бўрон Даллас ва Нью-Йоркга қараб йўналган.
Изоҳ (0)