Pfizer ва BioNTech ўз вакцинасини ҳомиладор аёлларда синашни бошлади

Германиянинг BioNTech компанияси билан ҳамкорликда коронавирусга қарши вакцина ишлаб чиққан Американинг Pfizer компанияси ҳомиладор аёллар орасида препаратнинг хавфсизлиги ва самарадорлигини клиник синовлардан ўтказишни бошлади. Бу ҳақда Reuters хабар берди.

Клиник синовларда 18 ёшдан ошган, ҳомиладорлик муддати 24-34 ҳафтани ташкил этаётган 4 мингга яқин аёллар иштирок этмоқда. Тадқиқотнинг мақсади 21 кунлик оралиқда берилган икки дозали вакцина ёки плацебонинг хавфсизлиги, бардошлилиги ва иммуногенлигини баҳолашдан иборат.

Олимлар вакцинанинг бола учун хавфсизлигини баҳолаш учун 7-10 ой давомида тажриба иштирокчиларининг ҳомиладорлик ва туғиш жараёнини кузатади. Чақалоқлар туғилганидан сўнг, тахминан, олти ой давомида назорат остида бўлади. Бундан ташқари, компания таъкидлаганидек, плацебо олган иштирокчилар бола туғилгандан сўнг эмланиши мумкин.

«Биз ушбу тадқиқотни бошлаб, ҳомиладор аёллар учун эмлашнинг хавфсизлиги ва самарадорлиги ҳамда вакцинанинг ушбу муҳим тоифа — ҳомиладорлар учун доимий қўллаш мумкинлиги тўғрисида далилларни тўплашдан мамнунмиз»,— деди Pfizer клиник тадқиқотлар бўйича вице-президент Уильям Грабер.

Унинг қўшимча қилишича, ҳомиладор аёллар коронавирусга чалинса, уларда асоратлар қолиши ва касаллик оғир кечиши хавфи юқорироқ.

Жаҳон соғлиқни сақлаш ташкилоти (ЖССТ) Иммунизация ва вакциналар бўлими директори Кейт O’Браен ўз навбатида Pfizer ва Moderna сингари РНКга асосланган коронавирусга қарши вакциналар ҳомиладор аёллар учун хавф туғдиради, деб ишонишга ҳеч қандай асос йўқлигини айтди. Шу билан бирга, вакциналарнинг ҳомиладорлик ва ҳомиладор аёлларга таъсири ҳақидаги маълумотлар қатъий баёнот бериш учун етарли эмас.

Pfizer ва BioNTech 2021 йил охирига қадар, кейинги бир неча ой ичида 5 ёшгача, шунингдек, 5 ёшдан 11 ёшгача бўлган болаларда эмлаш самарадорлиги бўйича қўшимча тадқиқотлар бошлашни ният қилмоқда.

Аввалроқ Москвадаги шифохона базасида «Спутник V» вакцинасининг 14-18 ёшлилар учун уч босқичли тадқиқотлари амалга оширилиши ҳақида хабар берилганди. Натижаларга қараб ўсмирлар вакцинация дастурига киритилиши мумкин.

Бундан ташқари, Россияда «Спутник V» вакцинасининг бурунга томизиладиган шакли ва янги «Спутник Лайт» вакцинаси синовдан ўтказилади.