Россия президенти Владимир Путин бир неча бор ўзининг генерал унвонига муносиблигини намоён қилган, аммо эндиликда бу унинг устувор вазифаси эмас, дея айтиб ўтди давлат раҳбарининг матбуот котиби Дмитрий Песков. Бу ҳақда «РБК» хабар берди.
«У президентлик вазифасини бажаради, қиладиган иши кўп... У давлат бошқаруви билан боғлиқ бошқа кундалик масалаларга эътибор қаратади», — дея Путин зобитлик фаолиятини олиб бормаслигини таъкидлади Песков.
Кремль вакили Россия раҳбарининг захирадаги ёки истеъфодаги полковник эканига аниқлик киритмади, аммо унинг даражасини катта лейтенант деб атади.
2019 йил январь ойида Путин артиллерия ходими, гаубица артиллерия назорати взводи қўмондони сифатида лейтенант унвонига тайинланганини маълум қилган эди. Бу қачон ва қандай шароитда содир бўлганига давлат раҳбари аниқлик киритмаган.
Кремль веб-сайтида Владимир Путин 1975 йилда Ленинград давлат университетининг юридик факультетини тугатгани ҳақида ёзилган. Шундан сўнг у контрразведка бўлинмасида ишлаган, сўнгра СССР Давлат хавфсизлик қўмитасининг Қизил Байроқ институтида (ҳозирги Ташқи разведка академияси) ўқиган.
1985—1990 йилларда у Германия демократик Республикасида Дрезден шаҳридаги ҳудудий разведка идорасида хизмат қилган ва у ерда подполковник унвони билан бўлим бошлиғининг катта ёрдамчиси лавозимига кўтарилган.
Аввалроқ Tesla ва SpaceX раҳбари Илон Маск Россия президенти Владимир Путинни Clubhouse ижтимоий тармоғи орқали мулоқот қилишга чақирган эди. Кремлдагилар ушбу таклифни қизиқарли деб атаган.
Январь охирида эса Путин ва Байден биринчи марта телефон орқали мулоқот қилган. Улар Навальний, Украина, киберҳужумлар ва бошқа кўплаб масалаларни гаплашган.
Изоҳ (0)