Мазаси оғизда эрийди: «Графлик харобалари» торти рецепти

Тортда безенинг енгил қирсиллаши ва кремнинг нозик таъми ажойиб тарзда уйғунлашган. Мазкур ширинлик оила аъзоларингизга ёқиши шубҳасиз.

Керакли маҳсулотлар:

• Тухум — 3 дона;
• Туз —бир чимдим;
• Шакар — 200 гр;
• Лимон шарбати — 1 ош қошиқ;
• Маккажўхори крахмали — 1 чой қошиқ;
• Сариёғ — 200 гр;
• Қуюлтирилган сут — 250 гр;
• Грек ёнғоғи — 100-150 гр;
• Шоколад — таъбга кўра.

1. Тухум оқини сариғидан ажратиб оламиз.
2. Бир чимдим туз солиб, тухум оқини кўпиртирамиз. Кўпик қотгач оз-оздан шакар соламиз ва яна миксерлашда давом этамиз.
3. Кўпиртирилган тухум оқига лимон шарбати солиб, яна миксерлаймиз. Сўнгра крахмални ҳам соламиз.
4. Тайёр массани кондитер қопчасига солиб, қандолат қоғози солинган печ патнисига қуйиб чиқамиз.
5. Безеларни 110 даража иссиқликдаги печда 2-2,5 соат пишириб оламиз.
6. Юмшаган сариёғни миксерлаймиз ва унга оз-оздан қуюлтирилган сут қўшамиз.
7. Ёнғоқни майдалаб, шоколадни эритиб оламиз.
8. Тайёр бўлган безеларга крем суртиб, идишга думалоқ қилиб териб чиқамиз, четларига ёнғоқ сепамиз.
9. Ҳар гал диаметрни кичрайтирган ҳолда безеларни тахлаб, бўш жойларини крем билан ёпамиз.
10. Торт устига ёнғоқ сепиб, шоколад қуямиз ва 2-3 соатга музлаткичга қўямиз.