Фарғонада Хитойдан олиб келинган ва ҳужжатларда «ўйинчоқлар» деб кўрсатилган товарлар орасида 48 дона учувчисиз учиш қурилмаси борлиги аниқланди. Бу ҳақда «Дарё»га вилоят божхона бошқармаси ахборот хизмати маълум қилди.
Қайд этилишича, Қўқон шаҳрида жойлашган корхона номига Хитойдан олиб келинган товарлар вилоят божхона бошқармаси контрабандага қарши курашиш ва божхона аудити бўлими ҳамда «Қўқон» ташқи иқтисодий фаолият божхона пости ходимлари томонидан божхона кўригидан ўтказилган. Натижада ҳужжатда «ўйинчоқ» деб кўрсатилган товарлар орасида қиймати 75 миллион сўмлик 48 дона фото ва видео тасвирга олиш қурилмаси билан жиҳозланган HT Turn C Fly русумли учувчисиз учиш қурилмаси борлиги аниқланган.
Ҳозирда мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
Изоҳ (0)