Андижон вилоятининг Асака туманида вояга етмаган фарзандлари учун тўланиши лозим бўлган алимент пулини ўз вақтида тўламаган олти нафар ота 15 суткага қамалди, дея хабар берди «Дарё» мухбири Умиджон Мамарасулов.
МИБ вилоят бошқармаси ахборот хизмати ходими Нурмуҳаммад Ғофуровнинг маълум қилишича, Асака туманида бўлиб ўтган навбатдаги суд мажлисида Маъмурий жавобгарлик тўғрисидаги кодекснинг 47-4-моддаси (вояга етмаган ёки меҳнатга лаёқатсиз шахсларни моддий таъминлашдан бўйин товлаш)га асосан алимент тўлашдан бўйин товлаб келаётган 6 нафар қарздорнинг маъмурий жавобгарлик иши кўриб чиқилган.
Аниқланишича, Фуқаролик ишлари бўйича Асака туманлараро судининг 2017 йил 17 мартдаги ижро варақасига кўра, қарздор Т.Х.дан ундирувчи М.Б. фойдасига икки нафар вояга етмаган фарзандининг моддий таъминоти учун ойлик иш ҳақи ва бошқа даромадларининг 1/3 қисми миқдорида алимент тўлаши белгиланган.
МИБ Асака туман бўлими ходимлари томонидан ижро ҳаракатлари давомида қарздор бир неча маротаба оғзаки ва ёзма равишда огоҳлантирилишига қарамай, уч йилдан ортиқ муддат давомида 24 миллион 358 минг 336 сўм алимент пулини тўламасдан бўйин товлаган. Шу сабабли бюронинг Асака туман бўлими ходимлари томонидан қарздор Т.Х.га нисбатан маъмурий баённома расмийлаштирилиб, жиноят ишлари бўйича Асака туман судига юборилган. Суд ишни кўриб чиқиб, қарздор Т.Х.га нисбатан 15 сутка қамоқ жазоси тайинланди.
Шунингдек, суд мажлиси давомида судья томонидан қарздорлар Ф.С. (17,8 миллион сўм), С.Ғ. (8,9 миллион сўм), Б.М. (8,7 миллион сўм), Р.Қ. (5,8 миллион сўм), З.Ж. (3,3 миллилон сўм)ларга нисбатан алиментдан бўлган қарздорликларини тўламаганликлари учун ҳар бирига 15 суткадан маъмурий қамоқ жазоси тайинланган.
Изоҳ (0)