Туркия Ички ишлар вазирлиги Курдистон ишчи партияси жангариларига қарши антитеррор операциялари давомида 718 нафар гумондор ҳибсга олинганини маълум қилди, деб ёзмоқда Daily Sabah нашри.
Операциялар 40 та провинцияда ўтказилган. Қўлга олинганлар орасида Халқлар демократик партиясининг аъзолари ҳам бор, улар мамлакатдаги этник жиҳатдан озчилик бўлган гуруҳлар, жумладан, курдларнинг ҳуқуқларини ҳимоя қилишга интилади.
Курдистон ишчи партияси курдларнинг сиёсий ҳуқуқлари ва Туркия таркибида мустақил давлат қуриш учун курашади. Мазкур гуруҳнинг фаолияти мамлакат ҳудудида тақиққа учраган.
Операцияларга параллель равишда Туркия ташқи ишлар вазири Мевлют Чавушўғлу айрим мамлакатларнинг террорчиликка қарши курашда икки томонлама ўйин қилаётгани ва жангариларнинг қонли жиноятларига кўз юмган ҳолда тарафкашлик қилаётганини қайд этди.
«Биз ҳечқачон ғарбдагилар каби икки хил стандартда ишламаганмиз ва иккиюзламачилик қилмаганмиз», — деган у.
Чавушўғлу Анқаранинг террорчилар, хусусан, Курдистон ишчи партиясининг жангарилари билан курашни давом эттириши ҳақида ваъда берган.
Туркия президенти Ражаб Тоййиб Эрдўғон ҳам бир неча марта АҚШни Курдистон ишчи партиясини қўллаб-қувватлагани ҳамда кўплаб туркларнинг ўлимига бефарқ қарагани учун танқид қилган.
2015 йил июль ойида Туркия Курдистон ишчи партиясига қарши курашни қайта бошлаган. Туркия Мудофаа вазирлигининг маълумотига кўра, ўтган вақт давомида хавфсизлик кучлари томонидан 10 мингдан зиёд жангарилар йўқ қилинган.
Аввал Туркия Қуролли Кучларининг Ироқ шимолида янги ҳарбий операцияни бошлагани ҳақида хабар берилганди. Шунингдек, январь охирида Туркия ИШИДга алоқадорликда гумонланаётган 4 нафар ўзбекистонликни Сурия чегарасида ҳибсга олгани маълум бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)