БААнинг Дубай шаҳрида йиғин ўтказаётган Ўзбекистон терма жамоаси 15 февраль, душанба куни Иорданияга қарши ўртоқлик учрашувида қатнашди.
Учрашув тенг курашлар остида бошланди. 12-дақиқадаёқ рақиб жамоа бир ўйинчи кам бўлиб қолди: Ҳамза ад-Дардур қўли билан рақибига атайин зарба бергани учун тўғридан-тўғри қизил карточкага лойиқ кўрилди.
Шундан кейин устунлик Вадим Абрамов шогирдлари томонига ўтди. Бироқ ҳисоб 70-дақиқага келиб очилди. Захирадан майдонга тушганига кўп бўлмаган Ҳусниддин Ғофуров рақиб дарвозабони билан бирга-бир вазиятга чиқиб борди ва имкониятни кўкка совурмади. Унга узатмани Ойбек Бозоров амалга ошириб берди.
81-дақиқада Бозоров ўнг қанотдан тезлик олиб, дарвозабонни алдаб ўтди тўпни жарима майдонига узатди, у ерда Темурхўжа Абдухолиқов дарвозани аниқ нишонга олди.
Мазкур йиғин доирасида Ўзбекистон терма жамоаси 12 февраль куни «Зенит» клубига қарши баҳс олиб борган ва 0:4 ҳисобида ютқазганди.
Назорат учрашуви
15 февраль, душанба
Ўзбекистон — Иордания 2:0
Голлар: 1:0 – 70 Ғофуров, 2:0 – 81 Абдухолиқов.Ўзбекистон: Абдувоҳид Неъматов, Ислом Қобилов, Ислом Тўхтахўжаев, Иброҳимхалил Юлдашев, Ҳожиакбар Алижонов, Одил Ҳамробеков, Санжар Қодирқулов, Акмал Мозгавой, Азиз Турғунбоев, Ҳожимат Эркинов, Темурхўжа Абдухолиқов.
Захирадан тушганлар: Игор Голбан, Ҳусниддин Ғофуров, Нурилло Тўхтасинов, Вагиз Галиулин, Мурод Холмуҳаммедов, Миржаҳон Мираҳмадов, Ойбек Бозоров, Ҳусниддин Алиқулов.
Четлатиш: Ҳамза ад-Дардур (12).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)