Бугунги кунда замонавий футбол ҳеч бир жабҳада шоу-бизнесдан қолишмайди. Ундаги асосий шахслар, яъни футболчиларнинг ташқи кўриниш ва кийиниш услубига алоҳида эътибор қаратиши ҳам ҳеч кимга сир эмас. Одатда шоу-бизнес вакилларининг аксарияти пластик жарроҳлик амалиётига мурожаат қилади ва қанчалик ажабланарли бўлмасин, ушбу ҳолатни футболчиларда ҳам учратиш мумкин. Улар ўз спорт формасини ушлаб туришдан ташқари ташқи гўзаллик билан ҳам шуғулланишга вақт топади. Бу эса ўз навбатида уларга реклама ва роликларда суратга тушиш ва қўшимча даромадга эга бўлиш имконини беради. Сезиб улгурганингиздек, қуйида ташқи кўринишини ўзгартиришга қарор қилган таниқли футболчилар ҳақида фикр юритамиз.
Криштиану Роналду
Португалия ва «Ювентус» юлдузи Криштиану Роналду ҳаёти давомида бир неча бор жарроҳлик столига ётган. Ёшлигида келишган одам сифатида кўрсатиш қийин бўлган Роналду ўтган йиллар ичида шу даражада ўзгардики, ҳозирда уни нафақат футбол мухлислари, балки спортдан анча йироқ бўлган инсонлар ҳам яхши танийди. Роналду «Спортинг»дан «Манчестер Юнайтед»га ўтганидан сўнг бутун бошли юз қисмини ўзгартиришга қарор қилади: бурун, ияк, юз тузилиши ва тишлар. Шунингдек, португалияликнинг соч кўчириш муолажасини ҳам ўтказгани айтилади. Шу тариқа Роналду футболдан умуман хабари бўлмаган миллионлаб мухлисларга эга бўлган. Буни унинг ижтимоий тармоқларда энг машҳур инсон эканлиги ҳам исботлаши мумкин.
Златан Ибрагимович
Италиянинг шонли «Милан» клубида иккинчи ёшлигини ўтказаётган швецияликнинг болалиги ҳавас қиларли даражада ўтмаган. Муҳожирлар оиласида йўқчиликда катта бўлган Златанни катта бурни туфайли тенгдош ва жамоадошлари «Буратино» деб масхара қилган. Аммо 2013 йилга келиб, Ибрагимовичнинг бурни ихчам ва чиройлироқ кўриниш олди. Гарчи футболчининг ўзи бу ҳақида гапиришни истамаса-да, инкор ҳам қилмайди.
Гарет Бэйл
Айни пайтда «Реал»нинг том маънодаги бош оғриғи бўлиб турган Гарет Бэйл «Тоттенҳэм»да ўйнаб юрган кезлари улкан қулоқларга эга эди. Ҳеч нарсани эътиборсиз қолдирмайдиган инглиз матбуоти эса бу борада ҳам уэлсликка тинчлик бермасди. Аммо Бэйл 2013 йилда «Реал»га ўтганидан сўнг клуби билан бир қаторда қулоқлари шаклини ҳам ўзгартиришга қарор қилади. Бу ўзгариш якунда унга яхши томондан таъсир қилади ва рекламаларга таклиф этила бошлади.
Рене Игита
Рене Игита энг «пластик» футболчи унвони учун бемалол Криштиану Роналду билан рақобатлаша олади. Боиси у ҳам бир вақтнинг ўзида ринопластика (бурун тўғрилаш), липосакция, ажинларни йўқотиш, юзни торттириш ва ияк соҳаларида жарроҳлик амалиётини бошдан ўтказган.
Шу тариқа колумбиялик дарвозабон «энг қўрқинчли одам» номидан халос бўлади. «Чаён зарбаси» билан машҳурликка эришган футболчи ҳеч қачон пластик жарроҳлик амалиётини ўтказганини яширмаган.
Роналдо
Бразилиялик собиқ ҳужумчи фаолиятининг дастлабки йилларидан бошлаб, ортиқча вазн муаммосидан азият чеккан ва ҳатто бу унинг фобияси ҳам бўлган. Аммо 30 ёшдан ошганида «Сўйлоқ»ни бу муаммо яна ҳам кўпроқ ташвишга сола бошлайди. Роналдо эса кўп ўйлаб ўтирмасдан ёғларни йўқотиш мақсадида жарроҳлик столига ётишга қарор қилади. Аммо бу уни ушбу муаммодан тўлалигича халос қилолмайди.
Мавзуга доир: Дунёнинг энг келишган 5 футболчиси (фото)
Изоҳ (0)