BAAning Dubay shahrida yig‘in o‘tkazayotgan O‘zbekiston terma jamoasi 15-fevral, dushanba kuni Iordaniyaga qarshi o‘rtoqlik uchrashuvida qatnashdi.
Uchrashuv teng kurashlar ostida boshlandi. 12-daqiqadayoq raqib jamoa bir o‘yinchi kam bo‘lib qoldi: Hamza ad-Dardur qo‘li bilan raqibiga atayin zarba bergani uchun to‘g‘ridan to‘g‘ri qizil kartochkaga loyiq ko‘rildi.
Shundan keyin ustunlik Vadim Abramov shogirdlari tomoniga o‘tdi. Biroq hisob 70-daqiqaga kelib ochildi. Zaxiradan maydonga tushganiga ko‘p bo‘lmagan Husniddin G‘ofurov raqib darvozaboni bilan birga-bir vaziyatga chiqib bordi va imkoniyatni ko‘kka sovurmadi. Unga uzatmani Oybek Bozorov amalga oshirib berdi.
81-daqiqada Bozorov o‘ng qanotdan tezlik olib, darvozabonni aldab o‘tdi to‘pni jarima maydoniga uzatdi, u yerda Temurxo‘ja Abduxoliqov darvozani aniq nishonga oldi.
Mazkur yig‘in doirasida O‘zbekiston terma jamoasi 12-fevral kuni “Zenit” klubiga qarshi bahs olib borgan va 0:4 hisobida yutqazgandi.
Nazorat uchrashuvi
15-fevral, dushanba
O‘zbekiston — Iordaniya 2:0
Gollar: 1:0 – 70 G‘ofurov, 2:0 – 81 Abduxoliqov.O‘zbekiston: Abduvohid Ne’matov, Islom Qobilov, Islom To‘xtaxo‘jayev, Ibrohimxalil Yuldashev, Hojiakbar Alijonov, Odil Hamrobekov, Sanjar Qodirqulov, Akmal Mozgavoy, Aziz Turg‘unboyev, Hojimat Erkinov, Temurxo‘ja Abduxoliqov.
Zaxiradan tushganlar: Igor Golban, Husniddin G‘ofurov, Nurillo To‘xtasinov, Vagiz Galiulin, Murod Xolmuhammedov, Mirjahon Mirahmadov, Oybek Bozorov, Husniddin Aliqulov.
Chetlatish: Hamza ad-Dardur (12).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)