Олий ва ўрта махсус таълим вазири Абдуқодир Тошқулов ёпиқ тарзда ўтказилган йиғилишда ОТМларга қарашли талабалар уйларида қизлар ва ўғил болаларнинг бир қаватда жойлаштирилганини танқид қилди, деб ёзмоқда «Gazeta.uz».
«Кейин яна ижтимоий тармоқларда айюҳаннос: ‘Бу киши ўзларининг эътиқодларидан келиб чиқиб, қиз бола билан ўғил болани ажратишни бошлади’, деб ёзишади. Бу гаплар нима керак менга?», — деди вазир.
Абдуқодир Тошқулов масъулларга мурожаат қилиб: «Қизингиз ўғил бола билан битта хонада овқат тайёрлашини хоҳлармидингиз? Қизингиз ўғил болаларга ҳар куни овқат пишириб беришини хоҳлармидингиз? Кирини ювишини хоҳлармидингиз?», — деб сўраган.
Шунингдек, кераксиз штатлар кўплигини эслатиб, улардан ходим қўйса бўлишини, «бу нарса бевосита раҳбарга боғлиқлигини» таъкидлаган. Бино битта бўлса, иккита кириш ва чиқиш жойи қилиш мумкинлигини ҳам айтиб ўтган.
Аввалроқ Олий ва ўрта махсус таълим вазири талаба қизларнинг хорижлик меҳмонларни кутиб олишга жалб қилинишига муносабат билдириб, бу ҳолатни мажбурий меҳнатнинг бир кўриниши деб атаган, «Нега менинг гул қизларим гул кўтариб чиқиши керак? У ерга ҳам ўзингизни фарзандингизни қўйиб кўринг», — деб айтганди. Шунингдек, ОТМларнинг алоқа телефонлари ишламаслигини, вазифасига совуққонлик билан ёндашган бир қатор ректорларни танқид қилганди.
Абдуқодир Тошқулов тизимда ҳаммасини ислоҳ қилиш учун атиги 3 ой етарли эканини, умуман олий таълим муассасасида нима ёқмаган бўлса, нимадан қийналган ва нима эриш туюлган бўлса ҳаммаси ислоҳ бўлишини айтганди.
Изоҳ (0)