Тошкентдаги жамоат транспортлари ҳаракатини кузатишга мўлжалланган мобил дастурлар маршруткалар ҳаракатини ҳам кўрсата бошлади. Бунга қадар улар фақат автобусларни кўрсатар эди, деб хабар беради «Тошшаҳартрансхизмат».
«Сиз эндиликда ўз манзилингизга етиб олиш учун фойдаланадиган 52М ва 110М йўналишли такси транспорт воситалари ҳаракатини олдиндан кузатиш учун, ‘Менинг йўналишим’, 2GIS ва 3ТМ мобил иловаларидан фойдаланишингиз мумкин», — дейилади хабарда.
Мазкур мобил дастурларга Тошкент шаҳридаги 52М ва 110М йўналишли такси транспорт воситаларининг ҳаракати киритилган бўлиб, ушбу жамоат транспорти ҳаракатини олдиндан кўриш ва бекатга етиб келиш вақтини онлайн тарзда кузатиш мумкин.
Шунингдек, бошқа йўналишли такси транспорт воситаларини ҳам тез орада онлайн кузатиш йўлга қўйилиши маълум қилинган.
Ҳозирда Тошкентдаги жамоат транспортлари ҳаракатини кузатишга мўлжалланган бир неча мобил дастурлар мавжуд, улар орасида иккита хориж компанияси ҳам бор — «Яндекс» (2019 йил сентябрдан кўрсата бошлаган) ва 2GIS (2019 йилнинг ноябридан).
Изоҳ (0)