“Yotoqxonalarda o‘g‘il bolalar va qizlarning bitta qavatda yashashi juda uyatli” — Oliy va o‘rta maxsus ta’lim vaziri

Oliy va o‘rta maxsus ta’lim vaziri Abduqodir Toshqulov yopiq tarzda o‘tkazilgan yig‘ilishda OTMlarga qarashli talabalar uylarida qizlar va o‘g‘il bolalarning bir qavatda joylashtirilganini tanqid qildi, deb yozmoqda “Gazeta.uz”.

“Keyin yana ijtimoiy tarmoqlarda ayyuhannos: ‘Bu kishi o‘zlarining e’tiqodlaridan kelib chiqib, qiz bola bilan o‘g‘il bolani ajratishni boshladi’, deb yozishadi. Bu gaplar nima kerak menga?”, — dedi vazir.

Abduqodir Toshqulov mas’ullarga murojaat qilib: “Qizingiz o‘g‘il bola bilan bitta xonada ovqat tayyorlashini xohlarmidingiz? Qizingiz o‘g‘il bolalarga har kuni ovqat pishirib berishini xohlarmidingiz? Kirini yuvishini xohlarmidingiz?”, — deb so‘ragan.

Shuningdek, keraksiz shtatlar ko‘pligini eslatib, ulardan xodim qo‘ysa bo‘lishini, “bu narsa bevosita rahbarga bog‘liqligini” ta’kidlagan. Bino bitta bo‘lsa, ikkita kirish va chiqish joyi qilish mumkinligini ham aytib o‘tgan.

Avvalroq Oliy va o‘rta maxsus ta’lim vaziri talaba qizlarning xorijlik mehmonlarni kutib olishga jalb qilinishiga munosabat bildirib, bu holatni majburiy mehnatning bir ko‘rinishi deb atagan, “Nega mening gul qizlarim gul ko‘tarib chiqishi kerak? U yerga ham o‘zingizni farzandingizni qo‘yib ko‘ring”, — deb aytgandi. Shuningdek, OTMlarning aloqa telefonlari ishlamasligini, vazifasiga sovuqqonlik bilan yondashgan bir qator rektorlarni tanqid qilgandi.

Abduqodir Toshqulov tizimda hammasini isloh qilish uchun atigi 3 oy yetarli ekanini, umuman oliy ta’lim muassasasida nima yoqmagan bo‘lsa, nimadan qiynalgan va nima erish tuyulgan bo‘lsa hammasi isloh bo‘lishini aytgandi.