Самарқандда иш вақтида ҳалок бўлган икки ишчининг оиласига компенсация пуллари тўланмаётгани маълум қилинди

Самарқандда ишлаб чиқариш билан боғлиқ иккита бахтсиз ҳодиса ўлим билан тугаган, аммо ҳалок бўлганларнинг оила аъзоларига компенсация пуллари тўланмаяпти, деб хабар бермоқда Zarnews.

Маълум қилинишича, 2021 йилнинг 2 январидан 3 январга ўтар кечаси, соат тахминан 00:00 лар атрофида Самарқанд шаҳар 4-умумий ўрта таълим мактаби қозонхонасида ишлаб чиқариш билан боғлиқ бахтсиз ҳодиса содир бўлган. Оқибатда ҳодиса ўт ёқувчининг ўлими билан тугаган.

13 январь куни эса соат тахминан 10:00 да Самарқанд шаҳар ободонлаштириш бошқармаси ишчиси ўз хизмат вазифасини бажариш вақтида ҳалок бўлган.

Ҳодиса Самарқанд шаҳар, Ҳужум кўчаси, «Самарқанд–Сингапур» хорижий корхонаси рўпарасида «Шаар» ташлама ариғининг қуйи қисмида ёпиқ ҳолатда ўтган қувур ичини маиший чиқиндилардан тозалаш вақтида содир бўлган. Ободонлаштириш бошқармаси ходими қувурга кириб, қуйи қисмида ишлаётган вақтда тўсатдан юқоридан маиший чиқинди ва сув келиб қолиши оқибатида сув остида қолиб, воқеа жойида ҳалок бўлган.

Касаба уюшмалари федерацияси меҳнат инспекциясининг меҳнат-ҳуқуқ ва техник инспекторларининг маълум қилишича, ҳар икки ҳолат бўйича бугунги кунга қадар марҳумнинг оиласига бир марта бирйўла тўланадиган нафақа тўлаб берилмаган. Шунингдек, боқувчисини йўқотганлик туфайли ойма-ой товон пули нафақаси ҳам тайинланмаган.

Маълумот учун, Меҳнат кодексининг 192 ва 193-моддаларида ходимнинг вафоти муносабати билан унинг қарамоғида бўлган шахсларга зарар тўловлари тўланиши лозимлиги белгиланган.

Ходим меҳнатда майиб бўлиши, касб касаллиги ёки меҳнат вазифаларини бажариш билан боғлиқ ҳолда соғлиғига бошқача тарзда шикаст етиши сабабли вафот этган ҳолларда иш берувчи марҳумнинг қарамоғида бўлган меҳнатга қобилиятсиз шахсларга, шунингдек, 16 ёшга тўлмаган ёки у вафот этган кунга қадар ундан таъминот олиш ҳуқуқига эга бўлган шахсларга, марҳумнинг вафотидан кейин туғилган фарзандига, шунингдек, ота-онасидан бирига, умр йўлдошига ёки оиланинг бошқа аъзосига, агар у ишламасдан марҳумнинг уч ёшга етмаган болалари (укалари, сингиллари) ёки невараларининг парвариши билан банд бўлса, зарарни тўлаши шарт.

Вафот этган боқувчининг қарамоғида бўлган ва унинг вафоти муносабати билан зарарни ундиришга ҳақли бўлган меҳнатга қобилиятсиз шахсларга тўланадиган зарар миқдори марҳумнинг ўртача ойлик иш ҳақи миқдорида, унинг ўзига ва унинг қарамоғида бўлган, лекин зарарни ундиришга ҳақли бўлмаган меҳнатга қобилиятсиз шахсларнинг улушини чегириб ташлаган ҳолда белгиланади.