Toshkent metrosi “Yunusobod” yo‘lining davomini qurish vaqtida yuz bergan fojia oqibatida halok bo‘lganlarga to‘lanishi kerak bo‘lgan tovon pullarini hisoblash jarayonlari davom etmoqda. Bu haqda Bandlik va mehnat munosabatlari vazirligi Davlat mehnat inspeksiyasi boshlig‘i Qudratullo Odinayev “Kun.uz”ga ma’lum qildi.
Foto: “Gazeta.uz”
18-dekabr kuni metro qurilishi maydonida tuproq ko‘chishi oqibatida olti ishchi halok bo‘lgandi. Shu kunning o‘zida hodisa sabablarini o‘rganish va oqibatlarini bartaraf etish uchun hukumat komissiyasi tuzilgan edi. Komissiya tarkibiga Bandlik va mehnat munosabatlari vazirligi vakillari ham kiritilgan.
“Vazirlikning Davlat mehnat inspeksiyasi ishtirokida baxtsiz hodisa sabablari o‘rganib chiqilmoqda. Fojia oqibatida halok bo‘lganlarga to‘lanishi kerak bo‘lgan tovon pullarini hisoblash jarayonlari davom etmoqda... Shuningdek, hodisa qurbonlarining oilalariga tovon pullarini to‘lash bo‘yicha tegishli tartibda prokuratura bilan hamkorlik olib borilmoqda”, — deb aytgan Qudratullo Odinayev.
Qayd etish joiz, “O‘zbekiston temir yo‘llari” kompaniyasi 19-dekabr kuni hukumat komissiyasi ko‘rsatmasiga muvofiq halok bo‘lgan har bir ishchining oilasiga 100 million so‘mdan mablag‘ ajratilib, shu kunning o‘zida topshirilgani haqida xabar bergan edi.
O‘shanda kompaniya rahbari Husniddin Hosilov: “O‘z nomimdan shuni va’da qilamanki, biz fojiali vafot etganlarning oilalari uchun munosib hayotni ta’minlash uchun barcha sharoitlarni yaratishga tayyormiz”, — degandi.
Qudratullo Odinayevning qo‘shimch qilishicha, fojia yuzasidan tuzilgan hukumat komissiyasining dastlabki xulosalari “ikki-uch kun” ichida e’lon qilinadi. Agar unda ishchilarning o‘limi mehnat vazifalarini bajarishi bilan bog‘liq holda yuz bergani tasdiqlansa, qonunchilikda belgilangan tartibda va miqdorlarda boshqa to‘lovlar ham amalga oshirilishi lozim bo‘ladi.
Jumladan, Mehnat kodeksining 192- va 193-moddalari xodimning vafoti munosabati bilan uning qaramog‘ida bo‘lgan shaxslarga zarar to‘lovlari to‘lanishi lozimligini ko‘zda tutadi.
