Ўзбекистонда оммавий тартибсизликка ва фуқароларга нисбатан зўравонлик қилишга оммавий даъват қилиш ҳам жиноий жавобгарликка сабаб бўлиши мумкин. «Миллий тикланиш» демократик партияси Марказий кенгаши раиси Алишер Қодировнинг маълум қилишича, «Миллий тикланиш» ва «Адолат» партияларининг Қонунчилик палатасидаги фракциялари томонидан қонунчиликка ўзгартириш ва қўшимчалар киритиш ташаббуси биринчи ўқишда қабул қилинди.
Унга кўра, Жиноят кодексининг 244-моддасига ўзгартириш киритилмоқда. Ушбу моддада ҳокимият вакилларининг қонуний талабларига фаоллик билан бўйсунмасликка, оммавий тартибсизликка ва фуқароларга нисбатан зўравонлик қилишга оммавий даъват қилиш каби ҳуқуқбузарлик учун жарима ёки 2 йилгача ахлоқ тузатиш ишлари ёхуд 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш жазоси назарда тутилмоқда.
Амалдаги Жиноят кодексининг 244-моддасида жиноий жавобгарлик қурол ёки қурол сифатида фойдаланиладиган бошқа нарсаларни ишлатиб ёхуд ишлатиш билан қўрқитиб шахсга нисбатан зўрлик ишлатиш, қирғин солиш, ўт қўйиш, мулкка шикаст етказиш ёки уни нобуд қилиш, ҳокимият вакилига қаршилик кўрсатиш орқали содир этилган оммавий тартибсизликлар ташкил қилиш, шунингдек, оммавий тартибсизликларда фаол қатнашиш каби ҳаракатларни содир этганлик учун белгиланган.
Бу каби жиноий ҳаракатлар 10 йилдан 15 йилгача озодликдан маҳрум қилиш билан жазоланади.
Шунингдек, Маъмурий жавобгарлик тўғрисидаги кодекснинг 201-моддасига қўшимча киритилмоқда. Унда, фуқароларни Ўзбекистон қонунчилик ҳужжатлари талабларини бажармасликка ёки бузишга, шу жумладан, оммавий ахборот воситаларидан, телекоммуникациялар тармоқларидан, интернет жаҳон ахборот тармоғидан, шунингдек, матнни нашр этиш ёки бошқа шаклда кўпайтириш турларидан фойдаланган ҳолда оммавий даъват қилиш каби ҳуқуқбузарлик учун базавий ҳисоблаш миқдорининг 60 бараваридан 80 бараваригача миқдорда жарима солинади.
Изоҳ (0)