Ўзбекистон Ички ишлар вазирлиги тизимида қатор лавозим ўзгаришлари содир бўлди. Давлат раҳбари матбуот хизмати 12 февраль куни Президент Шавкат Мирзиёев раислигида Ички ишлар вазирлигида бўлиб ўтган ёпиқ йиғилиш фонида кадрлар тайинлови тўғрисида қарорларни эълон қилди.
Унга кўра, генерал-лейтенант Баҳодир Аҳмедович Матлюбов Ички ишлар вазирлиги академиясининг бошлиғи лавозимидан озод этилди. У ушбу лавозимда 2016 йил декабридан ишлаб келаётган эди. Матлюбов ундан олдин ички ишлар вазири (2006–2013 йилларда) лавозимида ишлаган.
Рустам Абдуғаниевич Ҳотамов академиянинг янги раҳбари бўлди, шу муносабат билан у 2018 йил августидан буён эгаллаб турган ички ишлар вазирининг ўринбосари – Кадрлар бош бошқармаси бошлиғи лавозимини тарк этди.
Яҳёжон Ортиқбоевич Абдулҳақов ички ишлар вазирининг ўринбосари – Тергов бошқармаси бошлиғи этиб тайинланди. Илгари у Андижон вилояти ички ишлар бошқармаси бошлиғининг ўринбосари – Тергов бошқармаси бошлиғи лавозимида ишлаган.
Нажмиддин Садирович Тўрахўжаев вазирнинг ахборот технологиялари бўйича ўринбосари этиб тайинланди. Илгари у Вазирлар Маҳкамаси ҳузуридаги Давлат персоналлаштириш марказини бошқарган.
Аввалроқ Президент Тошкент шаҳар Ички ишлар бош бошқармасига ташриф буюргани ҳақида хабар берилганди.
Изоҳ (0)