Тошкент вилояти Ангрен шаҳридаги 41-мактабда ўқитувчи ўқувчини ургани акс этган видеотасвир тарқалгани ҳақида хабар берилганди. Ҳолат юзасидан Халқ таълими вазирлиги маълумот берди.
Халқ таълими вазирининг назорат-ҳуқуқий хизмати ташаббуси билан мазкур ҳолат шаҳар ҳокимлиги ҳузуридаги вояга етмаганлар ишлари бўйича идоралараро комиссиясига ўрганиш учун юборилди.
Ўрганиш натижаларига кўра, ўқувчи дарсга халақит бергани, ўқитувчи томонидан бир неча бор огоҳлантирилишига қарамасдан, ўқитувчига ноўрин сўзларни гапиргани аниқланган. Сўнгра ўқитувчи ўқувчини тартибга чақиришга ҳаракат қилганида ўқувчи томонидан турли ноўрин хатти-ҳаракатлар қилингани маълум бўлди.
Маълум бўлишича, биология фани ўқитувчиси З. Турдиева 9-«B» синфга биология фанидан дарсга кирган. Шу куни синф ўқувчиси Асадбек Қутбиддинов дарсга дафтарсиз келган. Ўқитувчи доскага мавзу ва режани ёзаётган пайтида Асадбек Қутбиддинов рухсатсиз биринчи қатордан тўртинчи қаторнинг биринчи партасига бориб ўтирган ва дарс жараёнига халақит қиладиган қилиқлар қилиб, қолган барча ўқувчиларни дарсдан чалғитган.
Ўқитувчи ўқувчини кетма-кет беш мартадан кўп огоҳлантиришига қарамай, дарс жараёнига халақит берган. Ўқитувчи мавзуни тушунтираётган вақтда ҳам ўқувчи яна ўринсиз қилиқлар қилиб ўқитувчини ва ўқувчиларни дарсдан чалғитаётгани учун уни доска олдига чиқариб, нега бундай қилаётгани бўйича изоҳ беришини сўраганида орқасига қараб, яна қилиқ қилиб, синфдаги ўқувчиларни кулдиргани учун ўқитувчи З. Турдиева ўқувчи Асадбек Қутбиддиновнинг курткаси устидан бир мушт туширган.
Ўқувчи А. Қутбиддинов ўқитувчи З. Турдиевага «Сиз боксёрсиз, яна мушт туширинг» деб ўқитувчини қуюшқондан чиқаргани учун ўқитувчи жаҳл устида ўқувчига бир неча бор мушт туширган. Ўқувчи дарс тугаганидан кейин яна ўқитувчини масхара қилиб, хонадан чиқиб кетган. Ўқитувчи З. Турдиева бу ҳолат бўйича мактаб раҳбариятини ва синф раҳбарини огоҳлантирмаган. Сабаби ўқитувчи қон босими кўтарилиб, хонада чамаси икки соатлар ўтириб, сўнг ўзи раҳбарлик қилаётган 6-«Д» синфда 2021 йилнинг 5 февраль куни бўлиб ўтадиган тадбирга тайёргарлик кўрган.
Ҳолат вояга етмаганлар ишлари бўйича идоралараро комиссияси раиси Салим Анорбоев, Халқ таълими бўлими мудири Роҳила Абдуқодирова ва Ички ишлар бўлими ходимлари томонидан атрофлича муҳокама қилинди.
«Бизда 47-модда нима учун? Биринчидан, ўқувчини таълимга жалб қилишдаги сусткашлиги, яъни дафтар олиб бермагани, телефон билан жўнатгани учун қўлланилади. Ота-она шу ишни қилма деганда, қилмас эди», – дейди Салим Анорбоев.
Ўқувчининг ота-онаси ушбу иш юзасидан кечирим сўраган.
«Бу менинг айбим. Ўқишига энди ўзим қарайман. 3-4 та молимиз бор, тирикчилигимиз бор, шуларда менга ёрдам беради. Мен ҳам баъзида мактабга бориб сўраб тураман. Ўқишига эътиборсизлигим учун узр. Аммо бир жойга бекорга чиқадиган бола эмас», – дейди ўқувчининг отаси.
Унинг онаси фарзандининг қилган иши учун узр сўраб, тарбиясига қаттиқроқ туришини айтди. Ўқувчилар ҳам содир этган ишидан пушаймонлигини билдириб, ўқитувчидан кечирим сўради.
«Ижтимоий тармоқда тарқалган видео кўплаб муҳокамага сабаб бўлди. Ўқитувчи ва ўқувчилардан узр сўрайман. Мен бу ҳолатни бундай даражада бўлишини билмагандим. Бу бошқа такрорланмайди.
Қилган ишимдан пушаймонман, ёшлик қилиб қўйдим. Устоздан ҳам узр сўрадим. Тенгдошларимга устозни ҳурмат қилишни, мактабга қуруқ келмасдан, билим олиб кетишларини сўраб қоламан», – дейди ўқувчилар.
«4 февраль куни бўлган воқеа ойнинг саккизинчи санасида ижтимоий тармоқларга чиқиб кетган ҳолат бўйича ота-оналар, энг аввало, мендан узр сўрашди. Фарзандлари тарбиясига эътиборли бўлишни, мактабга телефон олиб келмасликни, дарсга талаб даражасида тайёргарлик кўришини назоратга олишлигини айтиб, ваъда беришди», – дейди ўқитувчи.
Ҳолат юзасидан ота-оналарга нисбатан Маъмурий жавобгарлик тўғрисидаги кодекснинг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) асосан жарима қўлланилди.
Бундан аввал Самарқандда дарс пайтида оёғини парта устига қўйиб ўтирган мактаб ўқувчиларининг ота-оналари жаримага тортилгани, Жиззахдаги мактабларнинг бирида вояга етмаган ўқувчи ҳомиладор эканлиги ҳамда Бухорода ўғриликка қўл урган мактаб ўқувчисига суд ҳукми ўқилгани ҳақида хабар берилганди.
Изоҳ (0)