Uzbekistan Airways ҳафтада икки марта Тошкент–Нур-Султон–Тошкент йўналишида авиақатновларни амалга оширишни режалаштирмоқда, дея хабар бермоқда Транспорт вазирлиги.
Қайд этилишича, Ўзбекистон ва Қозоғистон авиация маъмуриятларининг келишувига асосан 2021 йилнинг 15 февралидан бошлаб, Тошкент–Нур-Султон–Тошкент йўналишида мунтазам авиақатновлар сони икки давлатдаги эпидемиологик вазиятни ҳисобга олган ҳолда ҳар бир томондан ҳафтасига 1 тадан 2 тагача кўпайтирилади.
Uzbekistan Airways томонидан Тошкент–Нур-Султон–Тошкент йўналишида ҳафтасига 2 маротаба: сешанба ва жума кунлари мунтазам авиақатновларни амалга ошириш режалаштирилмоқда.
Шунингдек, мазкур йўналишларда Қозоғистоннинг Air Astana авиакомпанияси томонидан ҳам парвозлар амалга оширилиши кутилмоқда.
Бундан аввал Эроннинг Iran Aseman Airlines авиакомпанияси Ўзбекистонга мунтазам авиақатновларни йўлга қўймоқчи экани, Тожикистон ва Ўзбекистон ўртасида мунтазам авиақатновлар тиклангани ҳамда Мисрнинг Fly Egypt авиакомпанияси Ўзбекистонга доимий рейсларни амалга ошириш учун рухсатнома олгани ҳақида хабар берилганди.
Изоҳ (0)