Олий ва ўрта махсус таълим вазири Абдуқодир Тошқулов республика ОТМларидаги алоқа телефонларининг ҳолатини танқид қилиб, тизимдаги кишилар бир-бирлари билан қўл телефонлари орқали иш битираётганини, бу эса оддий аҳолининг муассаса билан алоқаларини чеклаб қўяётганини таъкидлади.
«Менга шикоят тушяпти: бирорта олий таълим муассасасининг шаҳар телефонлари ёки ҳеч ким кўтармайди, кўтарса ҳам, муомаласи қўпол.
ОТМлардан талаб қиламиз — ҳаммада шаҳар телефони ишласин, менга қўл телефонида қўнғироқ қилманглар. Бир вақтлар ТерДУга борганимда муассасада 92 пара шаҳар телефонининг бирортаси ҳам ишламас эди. Ҳамма иш қўл телефони орқали битириларди.
Бу — давлатнинг, ҳукуматнинг бир идораси, вазирлик», — деган у соҳа мутасаддилари билан бўлиб ўтган ёпиқ мажлисда.
Абдуқодир Тошқулов икки ҳафтада вазирликдан тортиб ҳамма ректор ва проректорларнинг шаҳар телефони, ёрдамчи телефони киритилган абонент китобчасини тайёрлаб, ҳамма ОТМларга бепул тарқатишни топширган.
«Менинг столимда ҳам шу китобчадан туради. Мен ҳам шу рақамлар орқали боғланаман, текшириб кўраман», — деб таъкидлаган Олий ва ўрта махсус таълим вазири.
Аввалроқ Абдуқодир Тошқулов олий таълим муассасасида ҳаммасини ислоҳ қилиш учун атиги 3 ой етарли эканини айтгани, вазифасига совуққонлик билан ёндашган бир қатор ректорларни танқид қилгани ҳақида хабар берилган эди.
Шунингдек, талаба қизларнинг хорижлик меҳмонларни кутиб олишга жалб қилинишига муносабат билдириб, бу ҳолатни мажбурий меҳнатнинг бир кўриниши деб атаган, «Нега менинг гул қизларим гул кўтариб чиқиши керак? У ерга ҳам ўзингизни фарзандингизни қўйиб кўринг», — деб айтганди.
Изоҳ (0)