Россия Федерацияси таркибига кирувчи Удмуртия республикасида 12 февралдан бошлаб ҳимоя ниқобларини мажбурий тақиш бекор қилинади. Бу ҳақда республика раҳбари Александр Бречалов маълум қилди, деб ёзмоқда Meduza.
«12 февраль, жума кунидан бошлаб ҳудуддаги ниқоб тақиш режими тавсиявий хусусиятга эга бўлади», — дея таъкидлади Бречалов. Шу билан бирга, республика раҳбари аҳолини жамоат жойларида, дўконлар, театр ва транспортда ниқоблардан фойдаланишга чақирди.
Хабарга кўра, Удмуртия Россиянинг ниқоб тақиш талаби бекор қилинган биринчи ҳудуди бўлди.
2020 йил октябрь ойида Россиянинг истеъмолчилар ҳуқуқларини ҳимоя қилиш ва инсон фаровонлигини назорат қилиш бўйича федерал хизмати («Роспотребнадзор») мамлакатдаги ҳудуд раҳбарларига жамоат жойларида ниқоб тақиш устидан назоратни кучайтиришни тавсия қилганди. Орадан бир ой ўтмасдан, 18 ноябрь куни бош вазир ўринбосари Татяна Голикова «ниқоб тақиш режими мамлакатнинг барча ҳудудларида жорий қилинди», дея эълон қилган.
Декабрь ойининг ўрталаридан бошлаб мамлакатда коронавирусга чалиниш бўйича янги ҳолатлар сони аста-секин камайиб бормоқда. Жонс Ҳопкинс универстети маълумотларига кўра пандемия бошидан бери Россияда вирус юқтирганлар сони 3,9 миллион кишини ташкил этган, улардан 76,3 минг нафари вафот этган.
Аввалроқ ЖССТ коронавирусдан соғайганларга ниқоб тақишда давом этишни маслаҳат берганди.
Эслатиб ўтамиз, 25 январдан Австрия аҳолисига дўкон ва жамоат транспортида одатий мато ниқоб ўрнига юқори ҳимояланган FFP2 респираторини тақиши мажбурий этиб белгиланган эди.
FFP2 респираторини тақиш фақат Австрияда эмас, Германияда ҳам мажбурий қилинган. Мазкур қоида биринчи бўлиб Германиянинг энг йирик федерал штати Баварияда кучга кирган. Ангела Меркелнинг 16 та федерал штатлар раҳбарлари билан учрашувидан сўнг респиратор тақиш бутун Германия аҳолисига мажбурий қилинган. Германияда амалдаги чекловлар 14 февралга қадар узайтирилган.
Изоҳ (0)