Перуда COVID-19 коронавирус инфекциясига қарши аҳолини вакцинация қилиш бошланди, вакциналарнинг дастлабки дозаларини тиббиёт ходимлари қабул қилиб олмоқда. Бу ҳақда РПП радиосига асосланиб «РИА Новости» хабар берган.
Жанубий Америкада жойлашган Перу аҳолиси Sinopharm вакцинаси билан эмланмоқда. Дастлабки 300 минг доза мамлакатга 7 февралда етказиб берилган.
Икки кун давомида самолётлар пойтахт Лимадан мамлакатнинг бошқа ҳудудларига вакцина етказиб бериш ишларини амалга оширади.
Перу ҳукумати 14 февралда Sinopharm компаниясидан вакцинанинг навбатдаги партиясини қабул қилиб олишни режалаштирган. Шунингдек, давлат Pfizer ҳамда AstraZeneca компаниялари, бундан ташқари ЖССТнинг COVAX механизми билан ҳам келишувлар имзолаб улгурган.
2020 йил 12 декабрда Перунинг Каэтано Эредиа университетида Хитойнинг Sinopharm компанияси томонидан ишлаб чиқилган COVID-19’га қарши вакцинанинг клиник синовлари тўхтатилганди. Орадан қарийб икки ҳафта ўтгач, Перуда коронавирусга чалинганлар сони 1 миллион нафардан ошгани хабар қилинган. Январь охирида Перу ҳудудининг учдан бир қисмида COVID-19 тарқалиши билан боғлиқ вазиятнинг ёмонлашиши сабабли 31 январдан изоляция режими амал қилишни бошлаган.
Изоҳ (0)