Танзанияда бир неча ойдан бери расмий равишда коронавирус қайд этилмаяпти. Ҳукумат раҳбарлари эмланишдан бош тортиб, COVID профилактикаси сифатида анъанавий тиббиётдан фойдаланишни таклиф қилмоқда. Бироқ шифохоналар пневмония билан касалланган беморларга тўла, деб хабар берди Meduza.
58 миллион аҳоли истиқомат қиладиган Танзания давлатида 2020 йил баҳорида 509 нафар кишида коронавирус касаллиги қайд этилган, 21 киши касалликдан вафот этган. Бироқ 2020 йил июнь ойининг бошларида Президент Жон Магуфули мамлакатда касаллик чекинганини ва Танзания яна сайёҳларни қабул қилишга тайёрлигини расман эълон қилган. Коронавирусга қарши профилактика сифатида у доривор ўтлар, буғ муолажалари, занжабил ва пиёз аралашмасидан фойдаланишни таклиф қилган.
Ўшандан бери мамлакатда коронавирус билан касалланиш статистикаси юритилмаяпти. Аммо, тахминан, 2020 йил декабридан бошлаб Танзанияда пневмония симптомлари аниқланган ҳолатлар сони кескин ўса бошлади. Мамлакат президенти ўзи, соғлиқни сақлаш вазири ва бир нечта расмийлардан бошқа бирор кимнинг коронавирусга оид масалаларни жамоатга изоҳлашини тақиқлаган. Шунга қарамай, католик черкови вируснинг кенг ёйилаётгани ҳақида маълум қилган ва черков ишчиларини ниқоб тақишга даъват этган.
Касаллик ортиши ҳақидаги хабарлар фонида Магуфули мамлакат фуқароларини вирусни қўшни давлатлардан юқтириб келганликда айблади. Шунингдек, бир нечта шифохоналарга ташриф буюрган маҳаллий Соғлиқни сақлаш вазирлиги расмийлари пневмония билан касалланиш ҳолатларининг аксарияти коронавирус билан боғлиқ эмаслигини айтган. Улар мамлакат аҳолисини ниқоб тақишга чақирди, аммо бу «коронавирус туфайли эмас, балки нафас олиш йўллари касалликларининг олдини олиш учунлигини» таъкидлади.
Январь ойи охирида Магуфули танзанияликлардан «тажриба қуёнчаси сифатида фойдаланилишини» истамагани учун аҳолининг эмланмаслигини эълон қилди. У вакциналарни хавфли деб атади ва уларнинг иш беришига шубҳа билан қаради: «Агар оқ танлилар фойдали вакцина яратишга қодир бўлганда эди, улар ОИТС, саратон ва силга қарши вакциналарни ҳам топган бўларди».
Магуфулининг муносабати ЖССТ томонидан танқид қилинди, бироқ бир неча кундан кейин мамлакат соғлиқни сақлаш вазири Дороти Гважима вакциналардан воз кечиш мажбуриятини яна бир бор тасдиқлади. Вазир ҳукуматнинг «дори-дармон олиш бўйича ўз тартиб-қоидалари» борлигини айтиб, шунингдек, танзанияликларни шахсий гигиенага амал қилиш, қўлларни ювиш ва дезинфекцияловчи воситалардан фойдаланишга чақирди.
Axios нашрининг ёзишича, Танзания ўз ҳудудида коронавирус мавжудлигини инкор қилаётган дунёдаги ягона давлат эмас. Шу билан бирга, бошқа шу сингари мамлакатлар, масалан, КХДР ва Туркманистон ўз аҳолисини оммавий эмлашни режалаштирмоқда. Нашрнинг ёзишича, чегаралари очиқ шароитда Танзания ҳукуматининг хатти-ҳаракатлари бутун дунёга хавф туғдириши мумкин, чунки у ердан вируснинг янги турлари тарқалиши мумкин. Январь ойи охирида Данияда Танзаниядан қайтган икки кишига коронавируснинг «африкача» штамми ташхиси қўйилганди, мавжуд вакциналарнинг ушбу штаммга таъсири ёмонроқ бўлиши мумкин.
Бир қатор давлатлар аллақачон Танзания билан ҳаво қатновларини чеклаб қўйган. Масалан, Танзаниянинг собиқ метрополияси (мустамлакачи мамлакат) — Буюк Британия ҳукумати бу мамлакатдан келувчиларни ўз ҳудудига киришини тақиқлади, АҚШ ҳукумати эса коронавирус туфайли у ерга ташриф буюришни расман тавсия қилмаган.
Россияда Танзания билан боғлиқ чекловлар ўрнатилмаган. Танзаниядан қайтиб келган россияликлар уч кун ичида коронавирусга тест топшириши керак. Сўнгги икки кун ичида ушбу тест натижалари ижобий чиққан иккита ҳолат Хакасия ва Тула вилоятига келган сайёҳларда аниқланди.
Изоҳ (0)