ZTE компаниясининг мобил қурилмалар бўлинмаси президенти Ни Фей ўйин учун мўлжалланган Nubia Red Magic 6 смартфони мутлақо янгиланган совутиш тизимига эга бўлишини маълум қилди, деб хабар беради IXBT.
Унинг сўзларига кўра, смартфон янги юқори тезликда ишловчи вентилятор, шунингдек, сўзма-сўз «Тўққиз ўқли фазовий жойлашув ва сузувчи ҳаракат» дея таржима қилинадиган Nine-axis Spatial Positioning and Floating Movement инновацион технологик ечимига эга бўлади.
Ни Фейнинг қўшимча қилишича, улар нафақат вентиляторни кучайтирган, балки совутиш технологиясида ҳақиқий ютуққа эришган. Шунингдек, янги смартфонга оид видеоролик ҳам эълон қилинган бўлиб, унда фойдаланувчи Nubia Red Magic 6’ни қўлидан қўйиб юборган ва у том маънода ҳавода муаллақ қолган. Бу худди смартфон учун эътиборни тортишга қаратилган маркетинг усулига ўхшайди. Шунга қарамай, намойиш этилган видеонинг расмий изоҳини кутишдан бошқа илож йўқ.
Самарали совутиш тизими нафақат ўйинларда, балки 120 ваттли симли қувватлантириш жараёнида ҳам қўлланилади.
Nubia Red Magic 6 фаол совутиш тизимига эга Snapdragon 888 базасидаги биринчи флагманга айланади.
Изоҳ (0)