Нидерландия ҳукумати коронавирус тарқалишига қарши кураш чораси сифатида илгари ўрнатилган комендантлик соатини узайтиришга қарор қилди, деб ёзмоқда «РБК».
Ушбу чоралар 2 мартга қадар амал қилади, 21:00 дан 04:30 гача узрли сабабсиз кўчага чиқиш тақиқланади. Бундан ташқари, ҳукумат зарур маҳсулотлар сотилмайдиган дўконлар ва умумий овқатланиш шохобчалари фаолиятига қўйилган чекловларни кучда қолдирди.
Таъкидланишича, агар вирус тарқалиш динамикаси яхшиланса, комендантлик соати 2 мартдан олдинроқ бекор қилиниши мумкин.
Адлия вазирлиги раҳбари Фердинанд Грапперхаус чекловларни узайтириш қийин чоралигини айтиб, иложи бўлса, уларни муддатидан олдинроқ бекор қилишга ваъда берди. Ҳукумат 23 февраль куни комендантлик соатининг эпидемиологик вазиятга таъсирини баҳолайди.
Шу билан бирга, вазир касалликка чалинганлар сонининг ортиши ва янги коронавирус штаммларининг пайдо бўлишидан хавотирланаётган тиббиёт мутахассислари комендантлик соатини узайтиришни маслаҳат берганини таъкидлади.
23 январдан 10 февралга қадар ўрнатилган комендантлик соатининг узайтирилиши тўғрисида бош вазир Марк Рютте ҳам айтиб ўтган эди. Хусусан, у Британияда коронавирус кутилганидан тезроқ тарқалаётганини таъкидлаган. Агар шундай давом этса, Нидерландияда тез орада коронавируснинг учинчи тўлқини пайдо бўлади, дея огоҳлантирган бош вазир.
Эслатиб ўтамиз, 23 январдан Нидерландияда бутун мамлакат бўйлаб комендантлик соати кучга киргач, бир қатор шаҳарларида, хусусан, Амстердам ва Эйндховен шаҳарларида коронавирус пандемияси туфайли чекловларга қарши норозилик намойишлари бўлиб ўтганди. Намойишчиларга қарши полиция сув замбараклари, дубинкалар ва кўзни ёшловчи газдан фойдаланган. Тартибсизликлар чоғида Амстердамда бир нечта портлаш юз берган.
Изоҳ (0)