ОАВ: Танзанияда авж олган номаълум касалликдан 15 киши вафот этди

Танзанияда номаълум инфекцияни юқтириб олиш оқибатида камида 15 киши вафот этди ва 50 дан ортиқ одам касалхонага ётқизилди, деб ёзади «РБК». Бу ҳақда Africa Feeds нашри мамлакат соғлиқни сақлаш органлари вакилларига таяниб хабар берган.

«Бу касаллик ҳозирча кенг тарқалмаган, унинг авж олиши фақат битта маъмурий округда юз берди, у ерда одамлар қон қусиб, вақтида касалхонага олиб борилмаганлари ўла бошлади», — деди Мбея вилояти Чуня округи бош шифокори Фелиста Кисанду.

Унинг сўзларига кўра, дастлабки текширув кўрсатишича, асосан эркаклардан иборат бўлган беморлар ошқозон яраси ва жигар касалликларидан азоб чеккан.

Mwananchi нашри қайд этишича, Танзания соғлиқни сақлаш вазири минтақага экспертлар гуруҳини юборган. Олимлар касалликнинг авж олиш сабабларини ўрганиши ва тадқиқот учун намуналар олиши керак.

Ўтган йил декабрида Ҳиндистоннинг Элуру шаҳрида бир киши номаълум касалликдан вафот этгани, яна 315 киши худди шу касаллик белгилари билан касалхонага ётқизилгани хабар берилган эди. Касалланганлар 5 декабрь, шанба куни шифокорларга мурожаат қила бошлаган. Ўша куни номаълум касаллик белгилари Элурунинг турли ҳудудларида яшовчи 45 кишида аниқланган. 5 декабрдан буён 848 та касалланиш ҳолати аниқланган. Бир киши вафот этган. Беморлар бош айланиши, бош оғриғи, тутқаноқ тутишидан шикоят қилган. Дастлабки маълумотларга кўра, бунга заҳарланиш сабаб бўлган, у COVID-19’га алоқадор эмас.

Ноябрь ойида Сенегалда ўнлаб балиқчилар очиқ океанда номаълум касалликни юқтириб олган эди. Ўшанда Сенегалда (Ғарбий Африкада жойлашган) 200 га яқин киши номаълум касалликка чалинган, улар очиқ океанда уни юқтириб олгани тахмин қилинган эди.