Мактабгача таълим вазирлигида 9 февраль куни ўтказилган матбуот анжуманида Жанубий Кореядаги бир қатор ташкилотлар Ўзбекистон мактабгача таълим вазирлигига 275 та ақлли робот тақдим этгани маълум қилинди.
«Дарё» мухбирининг хабар беришича, вазирлик боғча тарбияланувчиларида алгоритмик фикрлашни ривожлантириш ҳамда робототехника ва дастурлаш кўникмаларини ўргатишга мўлжалланган пилот лойиҳасини ишга туширди. Лойиҳа Жанубий Кореянинг робот саноатини ривожлантириш институти (KIRIA), Корея ўқитувчилар уюшмаси, шунингдек, FRG Korea, Dazzle Edu, Genie Robot va SK Telecom компаниялари билан ҳамкорликда амалга оширилмоқда.
Мактабгача таълим вазири Агриппина Шиннинг таъкидлашича, лойиҳанинг пилот босқичи учун 275 та Алберт ва Генибот ақлли роботлари ҳамда 350 та ўқув қўлланмаси совға қилинган.
«Болаларни боғча давриданоқ робототехника сингари келажак касблари билан таништириш, уларда бунга қизиқиш уйғотиш мақсадида мазкур лойиҳага қўл урдик. Кореялик ҳамкорларимиз тақдим этган робот ва ўқув қўлланмалар Ўзбекистон бўйлаб 55 та боғчага 5 тадан тақсимланди. Пилот босқичида иштирок этаётган педагоглар роботлар билан ишлаш бўйича ўқув семинарларида иштирок этишди. Келгусида ақлли роботлар мамлакатимиздаги барча боғчаларга тарқатилиши режалаштирилмоқда», — деди Агриппина Шин.
Вазирлик ҳузуридаги Ахборот ва педагогик технологиялар инновацион маркази директори Оятилло Раҳматиллаевнинг айтишича, Алберт ва Генибот роботлари 6 ёшдан катта тарбияланувчиларга мўлжалланган. Боланинг онги айни шу ёшида турли кўникма ва билимларни ўзлаштира олади, шаклланади.
Биринчи босқичда бола тайёр кодлаш карталари ёрдамида ўйинчоқни ҳаракатлантириши, кўзини милтиратиш, гапириш, қўшиқ куйлаш, маълум кетма-кетликдаги амалларни бажариш буйруқларини бериши мумкин. Шу тарзда у код блокларининг ишлашини тушуниб олади, алгоритмик фикрлашга мослашади. Ёши каттароқ болалар роботни смартфонга улаб, ўз буйруқлари ва алгоритмларини яратиши мумкин.
«Боғчаларда роботлар ёрдамида ўқитиш услуби Жанубий Кореяда ижобий натижа кўрсатган. Шу жумладан, Франция, Испания, Коста-Рика ва Перудаги мактаб ва боғчаларда ҳам бу лойиҳанинг пилот босқичи ишга туширилган.
Биз бир йил давомида пилот лойиҳа самарадорлигини мониторинг қилиб борамиз ва охирида натижалар таҳлил қилинади. Агар лойиҳа муваффақиятли якунланса, республиканинг барча мактабгача таълим ташкилотларига мана шундай ақлли роботлар етказиш кўзда тутилмоқда. Бундан ташқари, роботларнинг иш функциялари имконияти чекланган болаларга мўлжалланган дастур билан тўлдирилади»,— деди Оятилло Раҳматиллаев.
Раҳматиллаевнинг айтишича, лойиҳанинг пилот босқичида роботлар кореялик ҳамкорлар томонидан бепул тақдим этилган бўлса, кейинги босқичда давлат бюджети, халқаро донор ташкилотлар маблағлари, имтиёзли кредитларни жалб қилиш режалаштирилган.
Изоҳ (0)