Президент Шавкат Мирзиёев 8 февраль куни «Чарм-пойабзал ва мўйначилик соҳаларини янада ривожлантиришга доир қўшимча чора-тадбирлар тўғрисида»ги қарорни имзолади, деб хабар беради ЎзА.
Ҳужжатга кўра, 2021—2022 йилларда чармдан тайёр маҳсулотлар, чарм-атторлик, шунингдек, мўйна ва жундан юқори қўшилган қийматли маҳсулотлар ишлаб чиқариш лойиҳаларини амалга ошириш учун умумий қиймати 50 миллион АҚШ доллари миқдоридаги кредит линиялари (устав фондида давлат улуши 50 фоиз ва ундан ортиқ бўлган) очилади.
Тикланиш ва тараққиёт жамғармаси кредит линияларини тегишли тижорат банкларига 3 йиллик имтиёзли даврни ўз ичига олган ҳолда 7 йил муддатгача, йиллик 4 фоиз ставкаси шартларида очади. Кредитлар тадбиркорлик субъектларига замонавий янги ускуна ва технологияларни харид қилиш учун 2 йиллик имтиёзли даврни ўз ичига олган ҳолда 7 йил муддатгача, йиллик 6 фоиз ставкасида ажратилади.
«Ойбек-автойўл» (Тошкент вилояти) ва «Сариосиё-автойўл» (Сурхондарё вилояти) чегара ўтказиш пунктларидан қўшни давлат чегарасигача бўлган жойларда эксперимент тариқасида маҳаллий тайёр маҳсулотлар савдосига ихтисослаштирилган савдо нуқталарини ташкил этиш этилади. Ушбу савдо нуқталарида фаолият юритадиган тадбиркорлар томонидан реализация қилинадиган ҳамда қўшни давлат ҳудудига олиб чиқилган товарлар экспортга тенглаштирилади.
Шунингдек, 2022 йил 1 июнга қадар эксперимент натижаларидан келиб чиқиб, республиканинг бошқа халқаро қатновлари учун очиқ бўлган чегара ўтказиш пунктларидан қўшни давлат чегарасигача бўлган жойларда маҳаллий тайёр маҳсулотлар савдосига ихтисослаштирилган савдо нуқталарини ташкил этиш бўйича Вазирлар Маҳкамасига таклиф киритилиши белгиланган.
Бундан ташқари, «Ўзчармсаноат» уюшмаси томонидан Чарм-пойабзал соҳасини ривожлантириш ва қўллаб-қувватлаш жамғармаси маблағлари ҳисобидан республика ҳудудларида ва хорижий давлатларда маҳаллий корхоналарда ишлаб чиқарилган чарм маҳсулотлари савдосига ихтисослаштирилган Multibrand дўконларини ташкил этиш ва унинг электрон савдо платформасини яратиш тўғрисида қарор қабул қилинган. Инвестициялар ва ташқи савдо вазирлигига «Ўзчармсаноат» уюшмаси билан биргаликда Multibrand дўконларини хорижий давлатларда ташкил этиш бўйича тегишли чораларни кўриш вазифаси юкланган.
Шунингдек, ҳужжат билан 2023 йил 1 январга қадар Ўзбекистон ҳудудига олиб киришда божхона божининг нол ставкаси қўлланиладиган хом ашё, материаллар ва фурнитуралар рўйхати тасдиқланган.
Эслатиб ўтамиз, 2019 йилда «Ўзчармсаноат» уюшмаси раиси ўринбосари Фарҳод Нурмуҳаммедов Ўзбекистонда Ўрта Осиё ҳудудида тери ва теридан маҳсулот тайёрланадиган марказ бўлиши учун барча имкониятлар мавжудлигини айтганди.
Изоҳ (0)