Prezident Shavkat Mirziyoyev 8-fevral kuni “Charm-poyabzal va mo‘ynachilik sohalarini yanada rivojlantirishga doir qo‘shimcha chora-tadbirlar to‘g‘risida”gi qarorni imzoladi, deb xabar beradi O‘zA.
Hujjatga ko‘ra, 2021—2022-yillarda charmdan tayyor mahsulotlar, charm-attorlik, shuningdek, mo‘yna va jundan yuqori qo‘shilgan qiymatli mahsulotlar ishlab chiqarish loyihalarini amalga oshirish uchun umumiy qiymati 50 million AQSh dollari miqdoridagi kredit liniyalari (ustav fondida davlat ulushi 50 foiz va undan ortiq bo‘lgan) ochiladi.
Tiklanish va taraqqiyot jamg‘armasi kredit liniyalarini tegishli tijorat banklariga 3 yillik imtiyozli davrni o‘z ichiga olgan holda 7 yil muddatgacha, yillik 4 foiz stavkasi shartlarida ochadi. Kreditlar tadbirkorlik subyektlariga zamonaviy yangi uskuna va texnologiyalarni xarid qilish uchun 2 yillik imtiyozli davrni o‘z ichiga olgan holda 7 yil muddatgacha, yillik 6 foiz stavkasida ajratiladi.
“Oybek-avtoyo‘l” (Toshkent viloyati) va “Sariosiyo-avtoyo‘l” (Surxondaryo viloyati) chegara o‘tkazish punktlaridan qo‘shni davlat chegarasigacha bo‘lgan joylarda eksperiment tariqasida mahalliy tayyor mahsulotlar savdosiga ixtisoslashtirilgan savdo nuqtalarini tashkil etish etiladi. Ushbu savdo nuqtalarida faoliyat yuritadigan tadbirkorlar tomonidan realizatsiya qilinadigan hamda qo‘shni davlat hududiga olib chiqilgan tovarlar eksportga tenglashtiriladi.
Shuningdek, 2022-yil 1-iyunga qadar eksperiment natijalaridan kelib chiqib, respublikaning boshqa xalqaro qatnovlari uchun ochiq bo‘lgan chegara o‘tkazish punktlaridan qo‘shni davlat chegarasigacha bo‘lgan joylarda mahalliy tayyor mahsulotlar savdosiga ixtisoslashtirilgan savdo nuqtalarini tashkil etish bo‘yicha Vazirlar Mahkamasiga taklif kiritilishi belgilangan.
Bundan tashqari, “O‘zcharmsanoat” uyushmasi tomonidan Charm-poyabzal sohasini rivojlantirish va qo‘llab-quvvatlash jamg‘armasi mablag‘lari hisobidan respublika hududlarida va xorijiy davlatlarda mahalliy korxonalarda ishlab chiqarilgan charm mahsulotlari savdosiga ixtisoslashtirilgan Multibrand do‘konlarini tashkil etish va uning elektron savdo platformasini yaratish to‘g‘risida qaror qabul qilingan. Investitsiyalar va tashqi savdo vazirligiga “O‘zcharmsanoat” uyushmasi bilan birgalikda Multibrand do‘konlarini xorijiy davlatlarda tashkil etish bo‘yicha tegishli choralarni ko‘rish vazifasi yuklangan.
Shuningdek, hujjat bilan 2023-yil 1-yanvarga qadar O‘zbekiston hududiga olib kirishda bojxona bojining nol stavkasi qo‘llaniladigan xomashyo, materiallar va furnituralar ro‘yxati tasdiqlangan.
Eslatib o‘tamiz, 2019-yilda “O‘zcharmsanoat” uyushmasi raisi o‘rinbosari Farhod Nurmuhammedov O‘zbekistonda O‘rta Osiyo hududida teri va teridan mahsulot tayyorlanadigan markaz bo‘lishi uchun barcha imkoniyatlar mavjudligini aytgandi.
Izoh (0)