Тошкент вилоятининг Чирчиқ шаҳрида IKEA компаниясининг инновацион мебель ишлаб чиқариш фабрикасини қуриш режалаштирилмоқда. «Gazeta.uz»нинг хабар беришича, бу ҳақда 8 февраль куни Шавкат Мирзиёевга намойиш этилган инвестиция лойиҳалари тақдимотида маълум бўлган.
Лойиҳани Тошкент вилояти ҳокими вазифасини бажарувчи этиб тайинланган Даврон Ҳидоятов намойиш этган.
Маълум қилинишича, лойиҳа ҳужжатида мебель ишлаб чиқариш фабрикасини қуриш ташаббускори сифатида IKEA МЧЖ кўрсатилган. Корхонанинг ишлаб чиқариш қуввати 17 миллион долларга тенг 3,2 минг дона мебелни ташкил этади. Лойиҳанинг умумий қиймати 52 миллион долларга баҳоланган бўлиб, 10 миллион доллар лойиҳа ташаббускорининг ўз ҳисобидан, қолган 42 миллион доллар эса хорижий инвестиция эвазига молиялаштирилади.
Мебель ишлаб чиқариш фабрикаси ишга тушгач, 320 та янги иш ўрни яратилиши кутилмоқда. Ушбу лойиҳани амалга ошириш учун 5,5 гектар ер майдони ажратилиши сўралган бўлиб, у 22 ой ичида амалга оширилади.
Аввалроқ Тошкент вилоятида 2021 йилда 355 та лойиҳа ишга туширилиши ҳақида хабар берилган эди. Умумий қиймати 1 миллиард 624 миллион доллар бўлган мазкур лойиҳаларнинг 198 таси саноат, 81 таси хизмат кўрсатиш, 76 таси қишлоқ хўжалиги соҳасидадир.
IKEA — трансмиллий корпорация бўлиб, 1943 йилда Швецияда 17 ёшли Ингвард Кампрад томонидан тузилган. Компания тез йиғиладиган мебель, ошхона техникаси ва уй жиҳозларини ишлаб чиқаради. Бош офис Нидерландияда жойлашган. IKEA 2008 йилдан бери дунёдаги энг йирик мебель сотувчиси ҳисобланади. IKEAнинг кўплаб дўконлари INGKА холдинг компаниясига тегишли, компания эса Stichting INGKА — дунёнинг энг бой 40 та фондларидан бири томонидан бошқарилади. Август ойининг охирида Ingka Group 50 дан ортиқ мамлакатларда 445 та чакана савдо дўконларига эга эди.
Изоҳ (0)